800 دۆنم زەوی پاککرانەوە کە سەوزەیان بە ئاوی زێراب لێ بەرهەم دەهێنرا

توانا نەقی

لە هەولێر بە سەدان دۆنم زەوی و دەیان خانووی پلاستیکی کە بەشێوەی زیادەڕۆ و لەسەر ئاوی زێراب و ئاوەڕۆ دروستکرابوون پاککرایەوە.

ئەمڕۆ چوار شەممە، پارێگای هەولێر بڵاویکردەوە، 800 دۆنم زەوی و زیاتر لە 100 خانووی پلاستیکی، کە بەشێوەی زێدەڕۆ لەسەر ئاوی زێراب و ئاوەڕۆ و ئاوی قورس دروستکرابوون تێکدرا و پاککرایەوە.

دەشڵێت،لەو خانووە پالستیکانە و ئەو زەوییە فراوانەدا سەوزەی بە ئاوى پیس لێ بەرهەم دەهێنرا و دەخرایە بازاڕەکانەوە.

کارزان عەبدولهادی سەرۆکی شارەوانی هەولێر بە 964ـی وت، ئەندامی ئەوانێش لە ناو ئەو لێژنەیە بووە کە سەردانی ئەو شوێنەیان کردووە و هیچ مەرجێکی تەندروستی تایادا نەبووە.

وتیشی، ئەو زەویانە و خانووە پلاستیکەکان دەکەوێتە ناوچەی عارەب کەندی هەولێر و سەرەتا بەس تێکدەدرێن ئەگەر ئەم جارە دووبارەی بکەنەوە خاوەنەکانیان ئەوە سزا دەدرێن.

تیمەكانی سەرۆكایەتی شارەوانیی هەولێر و لیژنەی هاوبەشی بەدواداچوونی پیسبوونی ژینگەی هەولێر، كارەكانی هەموو ئەو زەوییانەیان راگرت، كە بە ئاوی پیس سەوزە دەچێنن و بە شۆفڵ بەناویان كەوتن و تێكیاندان.

پێشتریش چەندین هەڵمەتی هاوشێوە لە ناوچە جیاوازەکانی هەولێر بەڕێوەچووە و کە تێیدا دەستکراوە به لادانى ئامێرەکانی ئاودان و لەناوبردنی گشت ئەو سەوزانەی بە ئاوی پیس ئاو دەدران، کە كاریگەریان لەسەر ژینگە و تەندروستی هاوڵاتيانى شارى هەولێر هەیە.