دیمەنێک لە تورکیا - Social Media
ئەمریكا و فەڕەنسا هاوكاریی دەگەیەننە توركیا
+964
كوردستان ئەحمەد- هەولێر
سەرۆكه‌كانی ئەمریكا و فەڕەنسا هاوخەمیی خۆیان بۆ رووداوی بوومه‌له‌رزه‌كه‌ی توركیا دەردەبڕی و دەڵێن، هاوكاری دەگەیەنینە لێقەوماوان.
جۆو بایدن سەرۆكی ئەمریكا لە تۆڕی كۆمەڵایەتی فەیسبووك ئه‌مڕۆ نووسیویەتی: “زۆر دڵگرانم بە بوومەلەرزەكەی سووریا و توركیا، تیمەكانم ئاگه‌داركردوەتەوە لەوەی هاوكاریی بگەیەننە لێقەوماوەكان، ئەمە كارەساتێكی دڵتەزێن و ناخۆشە”.
بوومەلەرزەکە سه‌رله‌به‌یانی ئه‌مڕۆ دووشه‌ممه 6ـی شوبات، 10 پارێزگای تورکیا و باکووری کوردستان، هه‌روه‌ها بەشێک لە رۆژئاوای کوردستان و باكووری سوریا، باشووری کوردستان و عێراقی گرتەوە، ئەمە جگە لەوەی لە لوبنان، ئوردن و میسر هەستی پێکراوە.
هەر لەبارەی بوومەلەرزەكەوە، ئیمانوێڵ ماكرۆن سەرۆكی فەڕەنسا لە تۆڕی كۆمەڵایەتیی فەیسبووك نوسیویەتی: “هاوخەمیی كارەساتەكەی توركیا و سووریاین، ئەوەی روویدا جێگەی نیگەرانییە و فەڕەنسا ئامادەیە هاوكاریی قوربانییەكان بكات”.
بوومەلەرزە دیاردەیەکی سروشتییە و بەهۆی جووڵانی پلێتەکانی ژێر زەوی روودەدات، لەگەڵ روودانیدا، زۆرجار زیان به دانیشتووانی شوێنه‌كه ده‌گه‌یه‌نێت، ئه‌گه‌ر زیانیش نه‌گه‌یه‌نێت، ئەو کەسانەی هەستی پێده‌كه‌ن تووشی شۆک و ترس و دڵه‌ڕاوكێ ده‌بن.
به پێی دوایین ئاماره‌كانی بوومه‌له‌ره‌زه‌كه‌ی ئه‌مڕۆ، 1498 كه‌س له توركیا و باكووری كوردستان گیانیان له‌ده‌ست داوه، 8533 كه‌سیش برینداربوون، هه‌روه‌ها له رۆژئاوای كوردستان و سووریا 403 كه‌س گیانیان له‌ده‌ست داوه و 1284 كه‌سیش برینداربوونه.