شارەوانیی هەولێر

ئەو كێڵگانەی سەوزەیان بە ئاوی پیس دەچاند بە شۆفڵ تێكدران

964+

ئەرسەلان عەبدوڵا

تیمەكانی سەرۆكایەتی شارەوانیی هەولێر و لیژنەی هاوبەشی بەدواداچوونی پیسبوونی ژینگەی هەولێر، كارەكانی هەموو ئەو زەوییانەیان راگرت، كە بە ئاوی پیس سەوزە دەچێنن و بە شۆفڵ بەناویان كەوتن و تێكیاندان.

سەرۆکایەتیی شارەوانیی هەولێر رایگەیاند، دوابەدوای بڕیارەكانی سەرۆكی حكومەتی هەرێمی كوردستان بۆ پاراستنی ژینگەی هەولێر، لە لایەن وەزیری شارەوانی و پارێزگاری هەولێرەوە لیژنەیەكی هاوبەشی بەدواداچوون و لێكۆڵینەوە پێكهات و رۆژی پێنجشەممە 16.1.2025 لەلایەن تیمەکانیان لە سەرۆکایەتیی شارەوانیی هەولێر و بە هەماهەنگی لەگەڵ لیژنەی هاوبەشی بەدواداچوونی هۆکارەکانی پیسبوونی ژینگەی هەولێر، دەستكرا بە هەڵمەتێکی فراوانی لادان و راگرتنی کارەکانی هەموو ئەو زەوییانەی بە نایاسایی و بەبێ مەرج و رێنمایی تەندروستی كارى كشتوکاڵی سەوزەی تێدا دەکرێت، كە بە ئاوی قورس و پاشماوەی ماڵان ئاو دەدرێت و سەرچاوەکەی ئاوی پیسی ماڵانە، ئەمەش هۆکارێکی سەرەکییە بۆ تووشبوون بە نەخۆشییە گوازراوەکان.

“هەڵمەتەکە لە ناوچەی توڕەق دەستیپێکردووە لە سنووری بەڕێوەبەرایەتیی شارەوانی شەش کە تێیدا دەستکراوە به لادانى ئامێرەکانی ئاودان و لەناوبردنی گشت ئەو سەوزانەی بە ئاوی پیس ئاو دەدران، کە كاریگەریان لەسەر ژینگە و تەندروستی هاوڵاتيانى شارى هەولێر هەیە”، شارەوانیی هەولێر وادەڵێت،

هەروەها باسی ئەوەشیان كردووە، تیمەکانی شارەوانی هەولێر لە رێگای چوار شۆفڵ و چوار گەڵابە  و یەك کرێن بەشدارییان لە هەڵمەتەکەدا کردووە.

چەند رۆژێك لەمەوبەر سەرۆكی حكومەتی هەرێمی كوردستان لەسەر ژینگەی هەولێر هاتەسەر خەت و چەند بڕیارێكی دەركرد، ئەمەش دوای ئەوەی سەبارەت بە پیسبوونی ژینگە و ئاسمانی هەولێر، دەنگی ناڕەزایی زۆر لە لایەن هاوڵاتییانەوە بەرزبووەوە، بە تایبەتی لە بەردەوامیی كاری پاڵاوگە نایاساییەكان.

سەرۆکی حکومەت چەند بڕیارێکی لەسەر پرسی ژینگە دەرکرد

سەرۆکی حکومەت چەند بڕیارێکی لەسەر پرسی ژینگە دەرکرد