دیمەنی کلینیکێکی جوانکاری لە رانیە وێنە: تەندروستی راپەڕین
کارمەند لە جێی پزیشک کاری کردووە
لە رانیە ژمارەیەک کلینیکی پێست و جوانکاری داخران
964+
ژێوار خدر
ژمارەیەک کلینیکی پێست و جوانکاری لە رانیە داخران، بەهۆی ئەوەی بەشێكییان مەوادی ماوە بەسەرچوویان هەبووە و لە بری پزیشک کارمەند لێزەری کردووە بۆ هاوڵاتییان و مۆڵەتی تەندروستیشیان نەبووە.
بەڕێوەبەرایەتی گشتی تەندروستی راپەڕین، ئەمڕۆ چوارشممە 15.1.2025 رایگەیاند، سێ کلینیکی پێست و جوانکارییان لە ناو قەزای رانیە داخستووە، بەهۆی ئەوەی مەرجە تەندروستییەکانیان جێبجێ نەکردووە.
بەڕێوەبەرایەتییەکە ناوی کلینیکەکانی بڵاوکردووەتەوە و دەڵێت،
كلینیكی د. سروە فەرەیدون بۆ پێست و جوانكاری، بۆ ماوەی پێنج رۆژ داخراوە و پێبژاردنی بۆ کراوە، بەهۆی ئەوەی مەوادی ماوەبەسەرچووی هەبووە و پزیشك ئامادە نەبووە و كارمەندەكان كاری لێزەریان بۆ نەخۆش کردووە.
روونیشیکردووەتەوە، كلینیكی د.ئاوات حەسەن بۆ پێست و جوانكاری و سەنتەری لێزەری سینا، هەردووکیان بۆ ماوەی پێنج رۆژ داخراون و پێبژاردنیان بۆ کراوە، بەهۆی ئامادە نەبوونی پزیشك، لەهەمان كاتدا ئەنجامدانی لێزەر لەلایەن کارمەندەکانەوە بۆ هاوڵاتیان و نەبوونی مۆڵەتی سەنتەر.
باسی لەوەشکردووە، تاقیگەی میدیا پڵەس ئاگاداركراوەتەوە كە لە ماوەی حەوت رۆژدا مەرج و رێنماییەكان جێبەجێ بكات بۆ دەرهێنانی مۆڵەت.
