بارهەڵگرێک رێگەی چوون بۆ گەلی عەلی بەگی داخستووە

ئەحمەد مستەفا

رێگەی چوون بۆ گەلی عەلی بەگ لە سۆران لە بەرەبەیانی ئەمڕۆ هەینییەوە داخراوە، بارهەڵگرێک خۆی کێشاوە بە پردی گەلی عەلی بەگدا و هاتوچۆ دەڵێت، مەترسیی رووخانی هەیە.

هاتوچۆی سۆران ئەمڕۆ هەینی 27.12.2024 لە بڵاوکراوەیەکدا باسی لەوەکردووە، ئۆتۆمبێلێک جۆری “ئیسکانیا” بارهەڵگر خۆی کێشاوە بە پردی گەلی عەلی بەگ شوێنی بەیەک گەیشتنی رووباری باڵەکیان و رواندز.

بەهۆی رووداوەکەوە، شوفێرەکە برینداربووە، وە بووە بە هۆکاری داخستنی رێگاکە، هاتوچۆ باس لەوەدەکات، زیان بە پردەکە “پردی گەلی عەلی بەگ” گەیشتووە و مەترسیی رووخانی هەیە.

لەو راگەیەندراوەدا کە 964 بینوویەتی، داوا لە شۆفێران کراوە، خێرایی کەم بکەنەوە و پابەندی هێما و رێنمایەکانی هاتووچۆ بن بۆ سەلامەتییان.

ئەم دیمەنانە سەرەتایی رووداوەکەیە _ وێنە: هەورامان نیعمەت