کۆچ وکۆچبەرانی عێراق:

زیاتر لە 110 ئاوارەی کەمپی دیبەگە بارگە و بنەیان تێکنا و گەڕانەوە زێدی خۆیان

964+

شۆڕش قادری

تاڕادەیەک ئاسایش و ئارامی گەڕاوەتەوە بۆ ناوچەکانی موسڵ و دەورووبەری، بۆیە کاتیەتی خەڵکانی دەربەدەری ئەو سنوورە بگەڕێنەوە زێدی خۆیان، لەو چوارچێوەیەشدا زیاتر لە 110 ئاوارەی کەمپی دیبەگە، بارگە و بنەیان تێکنا و بەرەو شوێنەکانی خۆیان گەڕانەوە.

وەزارەتی کۆچ و کۆچبەرانی عێراق لە زاری وەزیرەکەیەوە، ئیڤان فایەق بڵاویکردووتەوە، “111 ئاوارە کە لە کەمپی دیبەگەی پارێزگای هەولێر نیشتەجێ بوون، کەمپەکەیان جێهێشتووە و گەڕاونەتەوە قەزا و ناحیەکانی پارێزگای نەینەوا”.

“گەڕاندنەوەی ئەو ئاوارانە بە هاوکاری دەسەڵاتدارانی هەرێم و بەرپرسانی پارێزگای نەینەوا ئەنجام دراوە”، ئیڤان فایەق وای وتووە.

وەزیری کۆچ و کۆچبەرانی عێراق بڕیاریشی داوە، ئەو ئاوارانە هاوکاری دارایی بکرێن و یارمەتی بدرێن تا ئەو کاتەی لە شوێنەکانی خۆیان نیشتەجێ دەبن.