وێنەیەك لە واژۆكردنی یاداشتی لەیەكگەیشتنی نێوان هەولێر و هیندستان
یاداشتی لەیەكگەیشتنیان واژۆ كرد
وردەكاریی یاداشتی لەیەكگەیشتنی هەولێر و هیندستان چی تێدایە؟
964+
ئەرسەلان عەبدوڵا
یاداشتنامەیەکی لێکتێگەیشتن لە نێوان ژووری بازرگانی و پیشەسازی هەولێر و ئەنجومەنی بەرەو پێشبردنی بازرگانی هیندستان واژۆکرا و ئەندامێكی ژووری بازرگانیی هەولێریش دەڵێت، یاداشتەكە هاندەرێکی باش دەبێت بۆ بەرەو پێشبردنی پرۆسەی بازرگانی نێوان هەولێر و هیندستان.
رێوڕەسمی واژۆكردنی یاداشتەكە ئەمڕۆ پێنجشەممە 12.12.2024 لە نێوان سەرۆكی ژووری بازرگانی و پیشەسازیی هەولێر گەیلان حاجی سەعید و سەرۆکی ئەنجومەنی بەرەو پێشبردنی بازرگانی هیندستان موهیت سینگڵا لە هەولێر واژۆ كرا، كە كونسوڵی گشتی وڵاتی هیندستان لە هەولێر مادان گۆپاڵ و ژمارەیەك لە ئەندامانی هەردوولا ئامادەی بوون.
ئەندامی ژووری بازرگانی و پیشەسازیی هەولێر كامەران محەمەد ساڵح بە 964ی راگەیاند، یاداشتەكە شەش خاڵ لەخۆدەگرێت، كە هەمووی لە پێناو هاوكاری و هەماهەنگییە لە نێوان جوڵەی بازرگانی و ئابووری لە نێوان هەولێر و هیندستان.
وتیشی، بە پێی رێككەوتنی نێوان هەردوولا، كە یاداشتەكەدا واژۆ كراوە، كار بۆ پەرەپێدانی پەیوەندییەكانی نێوانیان دەكەن و زانیاری بازرگانی لەگەڵ یەكتر دەگۆڕنەوە، دڵنیابوونەوە لە نوێنەرایەتیی بارزگانی لە نێوان هەردوولا و بەشداریكرد لە پێشانگە و كارە بازرگانییەكانی نێوان هەردوولا، هەردوولا كۆبوونەوەی ساڵانە لەگەڵ یەكتر بكەن و پارێزگاری لە پەیوەندی و نهێنییە بازرگانییەكانی نێوانیان بكەن.
هاوكات ئاماژە بەوە كراوە، رێككەوتنەكە لە ئەمڕۆوە دەكەوێتە بواری جێبەجێكردنەوە.
