کێڵگە مینەکان چەند کەسیان کەمئەندام کردووە؟

وریا فەتاح

دەزگاى گشتى کاروبارى مین بەبۆنەی رۆژى جیهانى کەمئەندامان رایدەگەیەنێت، مین و تەقەمەنى بووەتە هۆى برینداربوون و گیانلەدەستدانى 13 هەزار و 500 کەس.

ئەمڕۆ 3ـى دیسەمبەر، رۆژى جیهانى کەمئەندامان و خاوەن پێداویستییە تایبەتەکانە

دەزگاى کاروبارى مین لە راگەیەنراوێکدا بڵاوى کردەوە، ساڵانێک لە شەڕ و قەیران لە هەرێمی کوردستان میراتێکی پڕ ئازاری مین وتەقەمەنی بەجێهێشتووە کە بووەتە هۆی گیانلەدەستدان و برینداربوونی زیاتر لە 13 هەزار و 500 کەس و پەککەوتە و بێبەشکردنیان لە ژیانی ئاسایی رۆژانەیان.

داواش لە هەردوو حکومەتى هەرێم و فیدڕاڵ دەکات، هەنگاوی جددی و کاریگەر بنێن بۆ بەدیهێنانی ژیانێکی شایستە بۆ کەمئەندامان و کەسانی خاوەن پێداویستی تایبەت و دابینکردنی هەموو ئەو مافانەی کە لە رێکەوتنە نێودەوڵەتی و نیشتمانییەکاندا بۆیان دیاریکراوە.

جەبار مستەفا، بەڕێوەبەرى گشتى دەزگاى مینى هەرێم بە 964ـى وت، لەسەرەتاوە 776 کیلۆمەتر چوارگۆشە خاکى هەرێم مینڕێژکرابوو، بەڵام 576 کیلۆمەتر چوار گۆشە پاککراوەتەوە و 200 کیلۆمەترى ماوە”.

لەبارەى ئامارى قوربانیانى مینەوە ئاشکراى کرد، تائێستا 13 هەزار و 580 کەس بەرکەوتەى مینن (گیانلەدەستدان و بریندار)، بەڵام ئامارى وردتر نییە و پێشبینى دەکەین 5000 کەسیان گیانیان لەدەست دابێت بەهۆیەوە و ئەوانى دیکە کەمئەندام بووبن.