بۆ ئاشنابوون بە بابەتە فریاگوزارییەکان

تەندروستی هەولێر راهێنان بە شۆفێری ئەمبوڵانسەکان دەکات

964+

شۆڕش قادری

بە مەبەستی راهێنان و ئاشنابوون لەبارەی بابەتی فریاگوزارییەکان و رووداوەکان، تەندروستی هەولێر خولێکی سێ رۆژەی بۆ 85 شۆفێری ئەمبوڵانس رێکخست.

بەڕێوەبەرایەتی گشتی تەندروستی هەولێر لە راگەیەنراوێکدا دەڵێت،  “لەڕێگەی بەشی کردە پزیشکییەکان بەهەماهەنگی بەشی پەرەپێدانی پیشەیی بەردەوام، بەهاوکاری بەشی ئاوارە و پەناهەندەکان لەبەڕێوەبەرایەتیمان و بە پاڵپشتی رێكخراوى UNHCR خولێکی سێ ڕۆژە بۆ 85  شوفێری ئەمبوڵانس رێکخرا”.

ئاماژەی بەوەشکردووە، لەخولەکەدا چەندین رێکاری کارکردن و چۆنیەتی مامەڵەکردن لەگەڵ رووداوەکان و روونکردنەوەی رێنماییەکان بۆ بەشداربووانی خوڵ لەکاتی راپەڕاندنی ئەرکەکانیان، شیکراوەتەوە.

هەروەها باسی وردەکاری و زانیاری دروستی ئەو پەیوەندیانە کراوە کە لەڕێگەی سەنتەری هەماهەنگی فریاکەوتن داوای بەهاناوەچوون دەکرێت.