ناوچەیەکى شوێنەوارى کفرى کێڵدرا
تەمەنى سەروو 2000 ساڵە
لە کفرى شوێنەوارێکى مێژوویى لەلایەن جوتیارێکەوە کێڵدرا
964+
وریا فەتاح
ئەمڕۆ هەینى، لەلایەن جوتیارێکەوە بە مەبەستى کشتوکاڵکردن، شوێنەوارى مێژوویى قەرەئۆغڵان لە سنوورى کفرى کێڵدرا.
بەڕێوەبەرایەتی شوێنەوار و کەلەپوری کفری بڵاوى کردەوە، رووبەرێکی زۆر لەشوێنەوارەکە کێڵدراوە، لە کاتێکدا ماوەى ساڵێکە پەرژینمان بۆ کردووە بۆ ئەوەى پارێزراو بێت.
“ئەو دەستە تێکدەرانە دەرگای پەرژینەکەشیان تێکداوە”، بەڕێوەبەرایەتی شوێنەوار و کەلەپوری کفری وا دەڵێت.
بەڕێوەبەرایەتییەکە وێڕاى ئیدانەکردنى تاوانەکە، دەشڵێت: بەڕێکاری یاسایی مامەڵەی لەگەڵ دەکەین و لەم پێشێلکارییە بێدەنگ نابین کە بەرامبەر یەکێک لە شوێنەوارە دێرینەکانی کفری و شارستانیەتی کوردستان و سامانێکی نیشتمانی کراوە کەتەمەنی لە دوو هەزار ساڵ زیاترە.
داواش لە ئیدارەی ناوچەکە و حکومەتی خۆجێی گەرمیان و کفری دەکەن، بەزووترین کات بێنە دەنگ بۆ ئەوەی ئەم پێشلکارییە یاسایی و کارگێڕیی و شارستانییە رێى لێبگرن.
