ئەو کەشتییەی کە بۆ هاوردەکردنی برنجەکە بەکارهێنراوە. فۆتۆ: وەزارەتی بازرگانی عێراق
بۆ بەشەخۆراکی مانگانەیە
کەشتییەک بە 44 هەزار تۆن برنجی ئەمریکییەوە گەیشتە عێراق
964+
ژووری هەواڵ
بۆ دابینکردنی مادەکانی بەشەخۆراکی مانگانەی هاوڵاتیان، وەزارەتی بازرگانی عێراق 44 هەزار تۆن برنجی ئەمریکی هاوردە کردووە و بە کەشتی گەیەندراوەتە عێراق.
لەما موسەوی، بەڕێوەبەری گشتیی کۆمپانیای بازرگانی خۆراک لە وەزارەتی بازرگانی عێراق رایگەیاند، کەشتییەکی هەڵگری 44 هەزار تۆن برنجی ئەمریکی گەیشتووەتە عێراق و بە مەبەستی دڵنیابوونەوە لە گونجاوی و کوالێتییەکەی، لەلایەن تیمەکانی کۆنتڕۆڵەوە پشکنینی بۆ ئەنجام درا.
راشیگەیاند، دوای دەرچوونی ئەنجامی پشکنینەکان و دڵنیابوونەوە لە گونجاوی و کوالێتی برنجەکە، بەسەر لقەکانی کۆمپانیاکەدا دابەش دەکرێت و پاشان لە بریکارەکانی خۆراکەوە دەدرێت بە هاوڵاتیان.
پێشتر، وەزارەتی کشتوکاڵی عێراق رایگەیاند، لە ماوەی شەش مانگی سەرەتای ئەمساڵدا، بڕی هەناردەکردنی بەرهەمی رووەکی و ئاژەڵی عێراق گەیشتووەتە زیاتر 400 هەزار تۆن.
لەو 400 هەزار تۆنە، 100 هەزار تۆن بەرهەمی رووەکی بووە لە 27 جۆر کە پێکهاتووە لە سەوزە و میوە و برنج.
