پێشمەرگە و هێزەكانی هاوپەیمانان هەڵسەنگاندن بۆ یاداشتی لێکتێگەیشتنی نێوانیاندا دەكەن

964+

ئەرسەلان عەبدوڵا

وەزیری پێشمەرگەی هەرێمی كوردستان لەگەڵ فەرماندەی گشتیی هێزەکانی هاوپەیمانان لە عێراق كۆبوونەوە و بە پێی زانیارییەكان، هەردوولا ئامادەكاری دەكەن بۆ هەڵسەنگاندنی یاداشتنامەی لەیەكگەیشتنی نێوانیان.

كۆبوونەوەكە ئەمڕۆ یەكشەممە 10.11.2024 لە نێوان شۆڕش ئیسماعیل وەزیری پێشمەرگە و جەنەڕاڵ هام، فەرماندەی گشتیی هێزەکانی هاوپەیمانان لە عێراق و شاندێکی یاوەری لە هەولێر ئەنجامدرا.

راگەیاندنی وەزارەتی پێشمەرگە دەڵێت، چەمکی کارکردنی هاوبەشی نێوان هەردوولا و ئامادەسازییەکان بۆ هەڵسەنگاندنی یاداشتنامەی لێکتێگەیشتنی نێوان هەردوولا، گفتوگۆی لەبارەوەکرا.

هەروەها باسی ئەوە كراوە، وەزیری پێشمەرگە بە گرنگییەوە باسی لە دۆخی ئێستای هێزەکانی پێشمەرگەی کوردستان و قۆناغی چاکسازی و بنیاتنانی دەڤەر و فیرقەی زیاتری لە وەزارەتەكەی كردووە.

لە بارەی هاوکارییەکانی هاوپەیمانان بۆ وەزارەتی پێشمەرگە، جەنەڕاڵ هام بەردەوامبوونی پاڵپشتی و پشتیوانی هاوپەیمانانی دووپاتکردەوە، ئومێدیش دەکەن بە ویست و ئیرادەی بەهێزی وەزارەتی پێشمەرگە بۆ چاکسازی، هێزی پێشمەرگەی کوردستان بەهێزتر و دامەزراوتربێت، ئەوانیش پشتیوانیان دەبن، ئەمە لە راگەیاندراوەكەی وەزارەتی پێشمەرگەدا هاتووە.

هێزەكانی هاوپەیمانان سوورن لەسەر چاكسازیی لە ناو هێزەکانی پێشمەرگە

یاداشتی لێکتێگەیشتنی نێوان پێشمەرگە و هاوپەیمانان چییە؟

هێزەكانی هاوپەیمانان پێشتر رایگەیاندووە، بە گوێره‌ی یاداشتنامەیەکی لێکتێگەیشتن کە لە 2016وە لەگەڵ هێزەکانی پێشمەرگە واژۆکراوە و بۆ ماوەی 10 ساڵ بەردەوام دەبێت، هاوپەیمانان زیاتر لە یەك ملیار دۆلار بۆ پڕچەک کردن، مەشقپێکردن، هاوکاری لۆجستی ‌و دارایی بۆ پێشمەرگە تەرخان دەكەن.

پێشمەرگەش لە بەرامبەردا لە رێگەی حکومەتی هەرێم‌ و وەزارەتی پێشمەرگەوە کار بۆ بەدامەزراوەییکردن‌ و یەکخستنەوەی هێزەکانی پێشمەرگەی کوردستان دەکات.

هاوکاریی دارایی هێزەکانی هاوپەیمانان بۆ مانگی 10 دابەش دەکرێت