یەکێک لە فەتواکان ... گرافیک؛ 964+
دوو به‌رگه و نزیکەی هه‌زار لاپه‌ڕه‌یه
فه‌تواكانى 14 ساڵى رابردووى هه‌رێم چاپده‌كرێن
964+
فه‌رهاد حه‌سه‌ن
یه‌كێتى زانایان، فه‌تواكانى 14 ساڵى رابردووى لیژنه‌ى باڵاى فه‌تواى هه‌رێم له دوو توێی كتێبێك به‌چاپ ده‌گه‌یه‌نێت و به‌رپرسی راگه‌یاندنیش به پڕۆژه‌یه‌كی گه‌وره باسیده‌كات و ده‌ڵێت یه‌كه‌مین پڕۆژه‌ى فه‌تواى خۆماڵییه.
لیژنه‌ى فه‌توا، له ساڵى 1970 له‌گه‌ڵ دامه‌زراندنى یه‌كێتى زانایانى ئایینى كوردستان دروستكراوه و تاوه‌كو ئێستا به‌سه‌دان فه‌توای له‌باره‌ى بابه‌تى جیاجیاوه ده‌ركردووه.
د.عەبدوڵا شێرکاوەیی، وتەبێژی یه‌كێتى زانایان به 964ـى راگه‌یاند، فه‌تواكان كۆكراوه‌ى ساڵانى 2010 تاوه‌كو 2024 ـن و له كتێبێكی دوو به‌رگ چاپ ده‌كرێت كه بە نزیکەی هه‌زار لاپه‌ڕه پێكهاتووه.
وتیشی “له قۆناغى كۆتایی كۆكردنه‌وه‌ى فه‌تواكانین و به‌م زووانه ده‌ست به چاپكردنى كتێبه‌كه ده‌كه‌ین و ماوه‌ى مانگێكی پێویسته تاوه‌كو بڵاوده‌كرێته‌وه”.
ئاماژه‌ى به‌وه‌شكرد، بابه‌ته‌كانى ئه‌م فه‌توایانه هه‌مه‌جۆرن له‌وانه‌ش، كۆمه‌ڵایه‌تى، مامه‌ڵه بازرگانییه‌كان، بابه‌ته هاوچه‌رخ و ئه‌لیكترۆنییه‌كان و چه‌ندین بابه‌تى دیكه‌ش.
روونیشیكرده‌وه، ئه‌مه یه‌كێكه له پڕۆژه گه‌وره‌كان و یه‌كه‌مین پڕۆژه‌ى فه‌تواى خۆماڵییه كۆده‌كرێته‌وه و به‌چاپ ده‌گه‌یه‌ندرێت ده‌شڵێت “زۆربه‌ى ئه‌و فه‌توایانه‌ى كه له پێش ساڵى 2010 دراون، له گۆڤارى په‌یامى زانایان بڵاوكراوه‌ته‌وه”.
لیژنه‌ى باڵاى فه‌تواى هه‌رێم، سه‌ر به یه‌كێتیی زانایانه و 18 لیژنه‌ى لاوه‌كى له شارو شارۆچكه‌كانى هه‌رێمی كوردستان هه‌یه.
