بڕێکی زۆری دەرمان دەستیبەسەردا گیراوە
لە هەولێر دوو گروپ بەتۆمەتی قاچاخچێتی دەرمان دەستگیر کران
964+
ژووری هەواڵ
ئاسایشی هەولێر بەتۆمەتی بەقاچاخبردنی دەرمان و ساخکردنەوەی بەشێوەی نایاسایی، دەستگیر کردنی دوو گروپی راگەیاند و دەڵێت، دەستیانگرتووە بەسەر بڕێکی زۆر لە دەرمان و “لاوازی جنسی”.
ئەمڕۆ سێشەممە 1.10.2024، ئاسایشی هەولێر رایگەیاند، دوو گروپی قاچاخچیەتی دەرمان کە بە شێوەی ئۆنلاین کاریان دەکرد دەستگیر کراون، کە خاوەنی سێ پەیجی ئۆنلاین بوون و لە تۆری کۆمەلایەتی فەیسبووک لە شارەکانى سلێمانى و کەرکوک و بەغدا، دەرمانی کێش دابەزاندن، کێش زیادکردن و لاوازى جنسى بە شێوەى ئۆنڵاین دەفرۆشت و رەوانەی هەولێر و دهۆکیان دەکرد.
دەستگیر کراوەکان دەرمانەکانیان بە شێوەى قاچاغ و بەبێ پشکنینى کوالێتى کۆنترۆڵى دەرمان هێناوەتە ناو هەرێمى کوردستان و “شێوازى گواستنەوە و هەڵگرتنیان ناتەندروست و نایاساییە و بەشێوەیەکی نەگونجاو لە ناو ماڵان و ژێرزەمینى باڵەخانەیەکدا حەشاردراون”، ئاسایشی هەولێر وا دەڵێت.
بەگوێرەی زانیارییەکانی ئاسایشی هەولێر، گروپى یەکەم، کە لە چوار کەس پێکدێن و 524 پارچە دەرمان و کەرستەى جنسیان لەلا بووە و دەستیبەسەردا گیراوە.
گروپی دووەمیش چوار کەسن، 182 پارچە دەرمانی کێش دابەزاندن، کێش زیادکردن و کەرەستەی جنیان پێبووە لە 36 جۆری جیاواز.
