چەند بارهەڵگرێک کە کاری کۆکردنەوەی خۆڵوخاشاک دەکەن وێنە: شارەوانی کەرکوک
ئومێدیان بە پۆلیسە بیانگرن
ئیشەکەی پارێزگاری کەرکوک خەڵکی قاچاخیش پارەی تێدا خوارد
964+
ئەحمەد مستەفا
شارەوانیی کەرکوک هانا بۆ پۆلیسی شارەکە دەبات، تا بەدوای ئەو کەسانەدا بگەڕێن ماوەیەکە بە ناوی کارمەندی شارەوانی، پیاوەتی بەسەر ئیشەکەی پارێزگارەوە دەکەن و لەبەرانبەر فڕێدانی خۆڵ و خاشاک پارەیان لە خەڵک وەرگرتووە.
روون نییە و شارەوانی روونی ناکاتەوە، ئەو کەسانە کێ بوون و ژمارەیان چەندە، وادەردەکەوێ مەبەستیان بووبێت جارێ خەڵک ئاگادار بکاتەوە.
رێبوار تەها، پارێزگای کەرکوک هەر هاتە سەر تەخت، ئیشێکی بەرچاو، کە کردی، ئەوەبوو بە کۆمپانیاکانی پاککەرەوەی کەرکوکی وت، “خۆڵ و خاشاکی ناو کۆڵانەکان لە دوو هەفتەدا پاک بکەنەوە، یان گرێبەستەکانتان هەڵدەوەشێنمەوە”.
ئیشەکە چلەی چوو، بەڵام پاککردنەوەی خۆڵ و خاشاک کۆتایی نەهاتووە، ئەمڕۆ 10.9.2024، شارەوانیی کەرکوک روونکردنەوەیەکی بە هەرسێ زمانی عەرەبی، کوردی و تورکمانی بڵاوکردووەتەوە و دەڵێت، “لە ماوەی رابردوودا تێبینی ئەوەمان کردووە، ژمارەیەک کەسی نەناسراو لەژێر ناونیشانی جیاجیا بڕە پارەیەک لە هاوڵاتیان وەردەگرن، لەبەرامبەر پاککردنەوەی کوچە و کۆڵانەکانی شارەکە و خۆیان وەک کارمەندی بەڕێوەبەرایەتیی شارەوانیی کەرکوک دەناسێنن”.
شارەوانی بێ بەریبوونی خۆی لەو کەسانە رادەگەیەنێت و دەڵێت، “نوێنەرایەتیی شارەوانی ناکەن و هیچ گرێبەستێکیان لەگەڵماندا نییە، ئێمە وێستگەکانی کۆکردنەوەی خۆڵ و خاشاکمان راسپاردووە، کە بە هیچ شێوەیەک مامەڵەیان لەگەڵدا نەکەن، کە زۆرێک لەو کەسانە زبڵەکانیان فڕێدەدەنە سەر شەقام و رێگا گشتییەکان و سیمای شارەکە ناشرین دەکەن”.
شارەوانی هانا بۆ پۆلیس دەبات و دەڵێت، “داوا لە پۆلیس و دەزگا ئەمنییەکان دەکەین بەدوایاندا بگەڕێن، بە مەبەستی گرتنەبەری رێوشوێنی یاسایی پێویست بەرامبەریان”، نیەتی خۆی دووپات کردووەتەوە دەڵێت، “وەک شارەوانی بەردەوام دەبین لە کارکردن بەمەبەستی پێشکەشکردنی باشترین خزمەتگوزاری”.
