تا چەند هاتنی مووچە کاریگەری لە سەر بوژاندنەوەی بازاڕ هەبووە؟

964+
ئارام ئەبوزێد – هەولێر

پاش هاتنی مووچە بازاڕ کەمێک گەڕموگوڕی پێوە دیارە و هاوڵاتیانیش رای جیاوازیان هەیە لە سەر بوژاندنەوەی بازاڕ، بەشێک لە کاسبکارن دڵخۆشن و بەشێکیش پێیانوایە مووچەخۆر دەست بە پارەکەیەوە دەگرێت و ناوێرێت بەدڵی خۆی پارە خەرج بکات.

کاکەشین جومعە کاسبکارێکی ناو بازاڕی هەولێرە و دەڵێت،”تا رۆژی چوارشەممەی رابردوو بازاڕ سست بوو، بەڵام ئێستا ئیشمان زۆر فەرقی کردووە و بازاڕ بە تەواوەتی جوڵاوەتەوە”.

“بازاڕ و خەڵک وەکوو تەسبیح پێکەوە گرێدراون و کاریگەری راستەوخۆیان لەسەر یەکتر هەیە، ئەگەر مووچەخۆر مووچەی وەرگرت، یەکسەر بازاڕ دەکرێتەوە و گەرموگوڕتر دەبێت”، کاکەشین جومعە وادەڵێت.

لە لایەکی دیکەوە هاوڵاتییەک بە ناوی گەیلان دەڵێت، “دابەشکردنی مووچە هیچ گۆڕانکارییەکی لەسەر بازاڕ دروست نەکردووە، چونکە خەڵک دڵنیا نییە لە مووچەکەی و دەست بە پارەکەوە دەگرێت و دەترسێت لەوەی کە نەکا تا 50 رۆژی تر مووچە وەرنەگرت”.

پێداچوونەوە: شۆڕش قادری