سەرچاوەیەکى باڵاى ئاسایشى کفرى بۆ 964
“هێزەکانى حەشدى شەعبى بەبێ ئاگادارکردنەوە هاتوونەتە سنوورى کوڵەجۆ”
964+
میلاد جەلال- گەرمیان
سەرچاوەیەکى باڵا لە ئاسایشى کفرى بە 964ـى وت،”لە گوندى 12 ئیمامەوە ئاسایش و پۆلیس، لە گوندى قەرەبڵاخیشەوە دانیشتووى گوندەکە و خەڵکانى خۆبەخش رووبەڕووى هێزەکانى حەشدى شەعبى وەستاون”.
ئەو سەرچاوەیە کە ناو و پۆستەکەى لاى 964 پارێزراوە وتیشى،”سێ لیواى حەشدى شەعبى بە ژمارەیەکى زۆر چەک و کەرەستەى سەربازییەوە هاتوونەتە سنووری ناحیەی گوندى سەید حوسێن لە ناحیەى کوڵەجۆ لە کفری و دەستیان بەسەر بیرەنەوتەكانی ئەو سنوورەدا گرتووە”.
وەک باسى دەکات، ئێستا لە سنوورەکە دۆخێکى لەناکاوى ئەمنى دروستبووە، ئاسایش و پێشمەرگە و پۆلیس رووبەڕووى هێزەکەى حەشدى شەعبى لە سنوورى گوندى دوانزە ئیمامەوە وەستاون و لە گوندى قەرەبڵاخیشەوە کە دەکەوێتە نزیک کوڵەجۆ دانیشتووى گوندەکە رووبەڕووى هێزەکە وەستاون.
سەرچاوەکەى ئاسایشى کفرى ئاماژەى بەوەشکرد، هێزەکەى حەشدى شەعبى بە بڕیارى فەرماندەى هێزە چەکدارەکان هاتوونەتە سنوورەکە و دەستیان بەسەر ئەو بیرە نەوتەى گوندى سەید حوسێدا گرتووە کە پێشتر پۆلیسى نەوت و کانزاکانى هەرێمى لێبوە.
پێداچوونەوە: وریا فەتاح
