دیمەنێکی گشتی شاری سلێمانی- وینە: 964
هەشت راسپاردەیان هەیە
لیژنەی ئارامی سلێمانی: ماڵی دەوڵەت بۆ بانگەشە بەکارنەهێنرێت
964+
ئەحمەد مستەفا
لیژنەی ئارامی سلێمانی بڕیاری دا، “هیچ کەلوپەلێکی ماڵی و دارایی دەوڵەت بۆ بانگەشە بەکارنەهێنرێ”، پابەندی کاندید و حزبەکانیش دەکات، لە پێش و پاش بانگەشە پابەندی رێنماییەکانی شارەوانی سلێمانی بن کە بە هاوبەشی کۆمسیۆن بڵاوی دەکاتەوە.
راسپاردەکان هەشت خاڵن، بڕیاریشیان داوە، “لەو ناوچانەی ئەزمەی هاتوچۆ دروستدەبێ”، هاتوچۆی شارەکە رێگە بە بانگەشە و گردبونەوەی جەماوەری نەدات.
پارێزگای سلێمانی ئەمڕۆ پێنجشەممە 22.8.2024، پێشنیار و راسپاردەکانی پەیوەست بە پڕۆسەی بانگەشەی هەڵبژاردنی خولی شەشەمی پەرلەمانی کوردستان بڵاوکردەوە، لە خاڵێکی دیکەی نوسراوەکەدا نوسراوە، “لەناو هیچ فەرمانگەیەکدا بانگەشە ناکرێ و هیچ فەرمانبەرێک مافی بانگەشە کردنی نییە”.
لیژنەی ئارامی راسپاردەکانی پەسەند کردووە و دوای جێبەجێ کردنی دەکات، ئەوە لە کاتێکدا لە سنووری پارێزگای سلێمانی، یەک ملیۆن و هەشت هەزار و 412 دەنگدەری گشتی مافی دەنگدانیان هەیە، بەسەر 477 بنکەی دەنگدان دابەشکراون، هەروەک 76 هەزار و 661 دەنگدەری تایبەت هەن و بەسەر 57 بنکەی دەنگدان دابەشکراون.
تا رۆژی 19.10.2024، کارتی بایۆمەتری بە دەنگدەران دەدرێتەوە بەبێ تۆمارکردنی ناوی نوێ، کە لایەنەکان بەو دەنگانە لە پارێزگاکەدا بەگشتی کێبڕکێ لەسەر 38 کورسی گشتی و یەک کورسی تورکمان و یەک کورسی مەسیحی دەکەن.
نوسراوی پێشنیار و راسپاردەکانی لیژنەی ئارامی سلێمانی: