سێ پرۆژەی نیشتەجێبوون و بازاڕی دهۆک کارەبایان 24 کاتژمێرییە

+964

هیڤی دێوالی – دهۆک

 لە پارێزگای دهۆک، جگە لە بازاڕی شارەکە، سێ ناوچەی دیکەی نیشتەجێبوون سیستمی پریپەید بەکاردێنن و کارەبایان نابڕێت، بەڕێوەبەری کارەبای گشتی دهۆکیش دەڵێت، ئەو ناوچانەی کارەبای پریپەید بەکاردەهێنن تووشی هیچ کێشەیێک نەبوون.

لە پارێزگای دهۆک لە سیتییەکانی ئەڤرۆ سیتی، گوندی فەرەنسی، بازاڕی دهۆک و سەنتەری قەزای ئامێدیش سیستمی پریپەید بەکاردەهێنن.

شاکر مەحمود، بەڕێوەبەری گشتیی کارەبای پارێزگای دهۆک بە964ـی وت، نزیکەی دوو ساڵە وەک تێست سیستمی کارەبای پریپەید لە بازاڕی دهۆک بۆ زیاتر لە دوو هەزار شوێن لەگەڵ دوو پڕۆژەی نیشتەجێبوونی گەورە جێبەجێ دەکرێت، لە سەنتەری قەزای ئامێدیش نزیکەی ساڵێکە بۆ 780 ماڵ ئەو سیستمە بەکاردێت و کارەبایان 24 کاتژمێرە.

وتیشی، بەهۆی کەمبوونەوەی کارەبا ئێستا کارکردن لە سیستمی پریپەید راگیراوە، بەڵام لە دهۆک ئێستاش 11 هەزار هاوبەشی کارەبا سیستمی کارت بۆ کارەبای نیشتمانی بەکاردێنن.

ئاماژەی بەوەش کرد، نرخی هەر کیلۆواتێک لە کارەبای کارتەکە بۆ شوقە و ماڵ 18 دینارە و بۆ شوێنی بازرگانی و ڤێلاکان هەر کیلۆواتێک نرخەکەی 150 دینارە.

بە وتەی بەڕێوەبەرەکە، لە پلاندا هەیە بۆ هەموو ماڵەکانی پارێزگای دهۆک سیستمی کارت بۆ کارەبای نیشتمانی بەکاربهێنن، بەڵام هەر کارەبای مۆلیدەیان هەیە، چونکە تا ئێستا لە سەنتەری پارێزگای دهۆک 11 هەزار ماڵ ئەو سیستمە بۆ کارەبای نیشتمانی بەکاردەهێنێن.

پێداچوونەوە: هاوبەش