“پێویستە چاكسازییەكانی وەزارەتی پێشمەرگە خێراتر بكرێت”

964+
ئەرسەلان عەبدوڵا

پێشمەرگە و هێزەكانی هاوپەیمانان لە هەولێر كۆبوونەوە و بە پێی راگەیاندراوی وەزارەتی پێشمەرگە جەخت لە خێراكردنی چاكسازیی وەزارەتەكە كراوەتەوە.

راگەیاندنی وەزارەتەكە بڵاویكردەوە، سەرۆکی ئەرکانی وەزارەتی پێشمەرگە و فەرماندەی هێزەکانی هاوپەیمانان لە هەرێمی کوردستان، سێشەممە كۆبوونەوەو پلانی چاکسازی و هەنگاوەکانی یەکخستنەوەی هێزەکانی پێشمەرگەیان  تاوتوێ كرد.

كۆبوونەوەكە لە نێوان فەریق روکن عیسا عوزێر سەرۆکی ئەرکانی وەزارەتی پێشمەرگە و کۆڵۆنێڵ راپ براندستێتەر فەرماندەی هێزەکانی هاوپەیمانان لە هەرێمی کوردستان و شاندێکی یاوەری، لە بارەگای وەزارەتی پێشمەرگە ئەنجامدرا.

بەپێی راگەیاندراوی وەزارەتەکە، تەوەری سەرەکیی کۆبوونەوەکە تایبەت بوو بە جێبەجێکردنی بەرنامە و پلانی چاکسازیی لە وەزارەتی پێشمەرگە و رێکخستنەوەی تەواوی هێزەکان، هاوکات بارودۆخی هەنووکەیی هێزی پێشمەرگە و پەرەپێدانی پەیوەندی نێوان وەزارەتی پێشمەرگە و هاوپەیمانان گفتوگۆ کراوە.

هەروەها ئاماژە بەوەش كراوە پرۆسەی چاكسازی لە وەزارەتی پێشمەرگە خێراتر بكرێت و هەنگاوەكان بە ئاراستەی یەکخستنەوەی یەکە جیاوازەکانی هێزەکانی پێشمەرگە بۆ سەر وەزارەتی پێشمەرگە و رێکخستنیان لە چوارچێوەی فیرقەی نوێ. بێت.

هێزەكانی هاوپەیمانان ماوەیەكی زۆرە لەگەڵ وەزارەتی پێشمەرگەی كوردستان خەریكی چاكسازی و ریفۆرمن، گرنگترین كاریش یەكخستنی هێزەكانی پێشمەرگەیە، بە تایبەتی یەكەكانی 70 و 80 و یەكخستی یەكەی ژمێریاری و چەند سێكتەرێكی دیكەی جیاواز.

وەزارەتی پێشمەرگە دوو گۆڕانكاریی كرد