ئاگر لە بەردەم گوندەکانە و بەرگریی شارستانیی دهۆک ناتوانن بچن

964+

هیڤی دێوالی – دهۆک

ئاگری بێ رەحم لە بەرەبەیانییەوە سنووری گوندەکانی دێرەشێ و رەزیکی لە دەڤەری بەرگارەی دهۆک دەسووتێنێ، ئاگرەکە گەیشتووەتە دەوروبەی گوندەکان و نزیکە لە ماڵەکان، دانیشتووانی گوندەکە خۆ بەخۆ خەریکی کۆنترۆڵکردنی ئاگرەکەن.

مەزەندەی گوند نشینێک وایە، سەدان دۆنم سووتابن ئاگرەکە هی ئەمڕۆ نییە و حەوت رۆژ زیاترە بەردەوامە، لە کاتێکدا بەرگری شارستانی دەڵێت، “ناتوانن بچنە ئەو ناوچانە”.

حەوت رۆژ زیاترە، ئاگر لە دەڤەری بەرگارەی و گوندە چوڵکراوەکان کەوتووتەوە و کۆنتڕۆڵنەکراوە تائێستا، ئەوەش بەهۆی ناسەقامگیریی ناوچەکە، بەرگری شارستانی پشتڕاستی ئەوەی کردەوە، “هوکاری ئاگرەکە بەهۆی تۆپبارانی نێوان گەریلاکانی پەکەکە و سەربازانی تورکیا کەوتووتەوە”.

چەند گرتە ڤیدیۆیەک شێرزاد بەرگارەی، هاوڵاتی گوندی دێرەشێیە بۆ 964ی  ناردووە و دەڵێت، “زیاترە لە شەش کاتژمێر ئاگرەکە نزیکی گوندەکەمان بووەتەوە و گەیشتووە نزیک گوندەکە و دانیشتووان و خەڵکی دەوروبەری گوندەکان هاوکاریمان دەکەن بۆ کوژاندنەوەی، چونکە تا ئێستا نەتوانراوە کۆنترۆڵ بکرێ و تیمەکانی بەرگری شارستانی ناتوانن نزیک ببنەوە”.

بە مەزەندەی ئەو گوندنشینە بێت، سەدان دۆنم پووش و پەڵاش و داری بەرهەمدار وەک (سماق و گوێز) و چەندین باخ سووتاون و زیانی بە بەرهەمەکەیان گەیاندووە، ئاماژەی بەوەش کرد، “هەفتەیەکە شەڕەتەقە بەردەوامە و چەند کاتژمێر جارێک سنوورەکە لەلایەن پەکەکە و تورکیاوە تۆپباران دەکرێت”.

لەلایەکی دیکەوە، بێوار عەبدولعەزیز،وتەبێژی بەرگریی شارستانیی پارێزگای دهۆک بە 964ـى وت، “لە هەر ناوچەیەک بۆردومان و شەڕ هەبێت، بە تایبەتی دەڤەرەکانی بەرگارەی، بە هیچ شێوەیەک تیمەکانمان ناتوانن نزیکی ببنەوە، بەهۆی ناسەقامگیری و مەترسی ناوچەکە”.

گوندی دێرەش دەکەوێتە سنووری قەزای ئامێدی و نزیکەی 15ماڵ تێیدا دەژین.

پێداچوونەوە: ئەحمەد مستەفا

تۆپباران بووتە هۆی کەمبوونەوەی بەرهەمی گوێز