پەسان لە کوردستانە.. لە رۆژێكدا سێ ملیۆن دۆلاری پەیداكرد
+964
ئاوات سلێمان- هەولێر
فیلمی پەسان، پێش نمایشکردنی لە سینەماکانی جیهان بایی سێ ملیۆن دۆلار پلیتی لێفرۆشراوە، هاوشانی سینەماکانی دنیا لە کوردستانیش نمایش دەکرێت.
فیلمی پەسان (Pathaan) کە بە هیندییەکەی پەسانى پێدەوترێت، بڕیارە ئەمڕۆ چوارشەممە 25ـی کانونی دووەم لە سینەماکانی جیهان نمایش بکرێت، کە شارۆخ خان و دیپیکا پاتوکۆن رۆڵی سەرەکی تێدا دەبینن.
ئەو فیلمە ئێستا لە سینەماکانی ئێمپایەر لە هەولێر رێکلامی بۆ دەکرێت و 27ـی ئەم مانگە نمایش دەکرێت، بە هەمانشێوە لە کەرکوک و بەغدا و دهۆک و بەسڕەش نمایشدەکرێت.
ئەكتەرانی سەرەكی فیلمەكە بریتین له شارۆخ خان، دیپیكا پاتوكۆن و جۆن ئەبراهام، كە سێ ئەستێرەی سینەمای هیند و جیهانن.
فیلمەكە باس لە سیخوڕێك دەكات كە كار بۆ حكومەتی هیند دەكات و كاری هەواڵگری دەكات و تووشی گرفتی زۆر دەبێت.
فیلمەكە ئەمڕۆ كاتژمێر 10بە شێوەی ئۆنلاین لە تەواوی سینەماكانی جیهاندا نمایش دەكرێت.
چاوەڕوان دەكرێت فیلمەكە ببێتە پڕبینەرترین فیلمی سینەمای ساڵی نوێ لە جیهاندا، تەنیا لە یەك هەفتەدا ترایلەری فیلمەكە شەست ملیۆن بینەری تێپەڕاند.