لۆگۆی پۆلیسی زاخۆ
خراپ بەکارهێنانی ئامێرەکانی پەیوەندیکردن
12 تۆمەتبار لە زاخۆ دەستگیر کران
964+
ژێوار خدر
پۆلیسی زاخۆ لە لاپەڕەی فەیسبوکی خۆیان لێدوانێکی ڤیدیۆییان بڵاو کردووەتەوە، تێیدا بەڕێوەبەری پۆلیسی زاخۆ دەڵێت، لە ماوەی دوو مانگی رابردوودا 12 کەسیان بە تۆمەتی خراپ بەکارهێنانی ئامێرەکانی پەیوەندیکردن لە سنووری ئیدارەی سەربەخۆی زاخۆ دەستگیر کردووە.
ئەحمەد رەمەزان، بەڕێوەبەری راگەیاندنی پۆلیسی زاخۆ دەڵێت، لەسەر سکاڵای چەند هاوڵاتییەک، پۆلیسی زاخۆ توانیویانە 12 تۆمەتبار لە ماوەی دوو مانگدا لە سنوورەکەیان دەستگیر بکەن، دەشڵێت ئەو تۆمەتبارانە هەڕەشەی بڵاوکردنەوەی وێنەیان لە هاوڵاتیان کردووە لە تۆڕە کۆمەڵایەتییەکان و هەروەها چەند ئەکاونتێکی هاوڵاتیانیشیان دزیوە.
لە لێدوانەکەیدا بەڕێوەبەری راگەیاندنی پۆلیسی زاخۆ روونیدەکاتەوە، ئەو تۆمەتبارانە لە بەردەم دادوەر دانیان بە تاوانەکەیاندا ناوە و ئێستا بە پێی بڕگەی 2 لە یاسای ژمارە 6 ساڵی 2008 رەوانەی دادگا کراون.
سزای خراپ بەکارهێنانی ئامارەکانی پەیوەندیکردن، دەکرێت بەند کردن بێت لە شەش مانگەوە بۆ پێنج ساڵ لەگەڵ سزای دارایی کە لە یەک ملیۆن دینارەوە دەستپێدەکات و بە پێنج ملیۆن کۆتایی دێت، یان یەکێک لەم دوو سزایە.
ساڵی 2008 پەرلەمانی هەرێمی کوردستان یاسایەکی بەناوی یاسای ژمارە 6ی قەدەغەکردنی خراپ بەکارهێنانی ئامێرەکانی پەیوەندیکردن دەکرد، ئەوەش بەمەبەستی بەرەنگاربوونەوە و کەمکردنەوەی تاوانە ئەلیکترۆنییەکان.
