ئۆتۆمبێلێک تەقییەوە و دوو کەس بریندارن

964+

ئەحمەد محەمەد

کەمێک پێش ئێستا، ئۆتۆمبێلێک لە نزیک پڕۆژەى میران سیتى لە شارى سلێمانى تەقییەوە و دوو کەس بریندارن.

سامان نادر، بەڕێوەبەرى سەنتەرى فریاکەوتنى خێرای سلێمانى بە 964ـى وت،”ئەوەى تەقیوەتەوە ئۆتۆمبێلێک بووە کە بەنزین بووە و کراوە بە غاز، شۆفێرەکەى هەردوو قاچى پەڕیوە و کەسەکەى تریش برینەکەى سەختە”.

بە وتەى سامان نادر، هەردوو بریندارەکە رەوانەى نەخۆشخانەى شار کراون.

سەرچاوەیەک لە نزیک شوێنى رووداوەکە بە 964ـى وت، دەنگێکى گەورە هاتووە و دواتر ئۆتۆمبێلێک ئاگرى گرتووە.

ئەو شوێنەى رووداوەکەى لێى رووداوە دەکەوێتە پشت زانکۆى سلێمانى و نزیکە لە پڕۆژەى نیشتەجێبوونى میران سیتى.

تائێستا 964 بۆى یەکلایى نەبووەتەوە، ئەو ئۆتۆمبێلە بەهۆى سیستمى غازەوە تەقیوەتەوە و ئاگرى گرتووە، یان هۆکارى دیکەی لە پشتە، لەگەڵ دەزگا ئەمنی و لایەنە پەیوەندیدارەکانیش لەسەر هێڵ دەبین و راستییەکەتان پێدەڵێین.

964 لەسەر ئەو بابەتە قسەى لەگەڵ وتەبێژى ئاسایشى سلێمانى کرد، کە ئایا هۆکارى تەقینەوەى ئۆتۆمبێلەکە غاز بووە یان هۆکارى دیکە، سەلام عەبدولخالق وتى،”جارێ نازانین و سەرقاڵى لێکۆڵینەوەین”.