ژمارەیەک منداڵی ئیشکەر لەسەر شەقام - وێنە: میدیاکان
کەیسیان بۆ دەکرێتەوە
96 منداڵی ئیشکەر لە سلێمانی تۆمار کراون
964+
پێشەوا محەمەد
لە سلێمانی 96 منداڵی ئیشکەر لە شەش مانگی سەرەتای ئەمساڵ تۆمار کراون، چاودێریی گەشەپێدانی کۆمەڵایەتیی سلێمانی دەڵێت، کارکردنی ئەو منداڵانەیان کردووە بە کەیس و کاری بۆ دەکەن.
لیژنەکانی بەڕێوەبەرایەتییەکە 745 سەردانی بۆ فولکە و شوێنە گشتییەکان کردووە و 59 سەردانیش بۆ ئەو شوێنانە کراوە گومان کراوە منداڵی خوار 18 ساڵ کاری تێدا بکات.
منداڵە ئیشکەرەکان 45ـیان هی ناوخۆ بوون، 19ـیان ئاوارە بوون، حەوت منداڵیان کۆچەری بوون و 25ـیان منداڵی پەنابەری سووری بوون.
هێمن محەمەد نەجم، بەرپرسی راگەیاندنی بەڕێوەبەرایەتیی گشتیی چاودێری و گەشەپێدانی کۆمەڵایەتیی سلێمانی بە 964ـی راگەیاند، ئەو 96 منداڵە فۆڕمیان بۆ پڕدەکرێتەوە، دواتر سەردانی خێزانەکانیان دەکرێت و ئەوەی بزاندرێت باری داراییان خراپە دەدرێنە منداڵپارێز و هاوکاریی داراییان بۆ دەبڕدرێتەوە بەو مەرجەی منداڵەکە نەنێرنەوە سەر شەقام و ئیشی پێ نەکەنەوە.
وتیشی، “هەروەها کێشەی خوێندنی منداڵەکان چارەسەر دەکرێت و دەخرێنەوە بەر خوێندن”.
ساڵی رابردوو بەڕێوەبەرایەتییەکە 505 منداڵی ئیشکەری لەناو سلێمانی تۆمار کردبوو، زانیاریی بەڕێوەبەرایەتییەکە ئاشکرای دەکات، رێژەکە لە کەمبوونەوەدایە.
“ئەو خێزانانەی دووبارە منداڵەکانیان بنێرنەوە سەر شەقام بۆ ئیشکردن و پێویستیان نەبێت و منداڵەکان بەکاربهێنن، لە قایمقامیەتی سلێمانی ئیجرائاتی تووندیان لەگەڵ دەکرێت تا رەوانەکردنەوەیان بۆ شوێنی خۆیان”، هێمن محەمەد نەجم وای وت.
