هەڵکەندنی لێواری خابوور
جادەی گەڕەکی جووەکان لەناوچوو
964+
شڤان عەبدوڵا – زاخۆ
بەهۆی هەڵکەندنی لێواری خابوور جادەی گەڕەکی جووەکان لە زاخۆ لەناوچوو.
ئەمڕۆ پێنجشەممە 30.5.2024، لەکاتی کارکردنی شوفڵ و حەفارەکان بۆ هەڵکەندنی لێواری خابوور، لەبەر دروستکردنی قۆنا‌غی دووەمی کۆرنیشی زاخۆ، جادەی گەڕەکی جووەکان کە بە گەڕەکی ئازادی بەناوبانگە، کەوت و رێگا نەما و ئاستەنگی هاتوچۆ دروست بووە.
ئێستا ئۆتۆمبێلەکان هەر بەیەکجاری ناتوانن هاتوچۆ لەو جادەیەدا بکەن، تەنیا مەتر و نیوێک ماوە و ئەویش مەترسی لەسەرە.
یونس محەمەد، سەرۆکی شارەوانیی زاخۆ بە 964ـی وت، “لە رێگەی ئێوەوە زانیمان ئەم شتە روویداوە، هەر ئێستا رێگای بەدیل بۆ گەڕەکەکە درەست دەکەین و هەرچی زووە مەترسییەکە ناهێڵن و چارەی دەکەین”.
گەڕەکی جووەکان نزیکەی 200 خانووی تێدایە، دەکەوێتە سەنتەری بازاڕی زاخۆ لە نێوان دوو ئاراستەی خابوورەکەی زاخۆ، ئیدارەی زاخۆ بڕیاری داوە گەڕەکەکە هەموی لەناوببرێت و بیکاتە شوێنێکی گەشتیاری، بەڵام تا ئێستا هاوڵاتیان تێیدا نێشتەجێن.
پێداچوونەوە: هاوبەش
