کەسێک بە تۆمەتی کردنەوەی ئاگرەکەی کالیفۆرنیا دەستگیرکرا

ژێوار خدر

دەسەڵاتدارانی کاڵیفۆرنیا تۆمەتبارێکیان دەستگیرکردووە کە گومان دەکەن، پەیوەندی بە ئاگرکەوتنەوەی ناوچەی کینێثەوە هەیە لە لۆس ئەنجلۆس. کەسەکە پیاوێکی بێ ماڵ و حاڵ لە تەمەنی 30 ساڵیدایە.

بەپێی سەرچاوە ئەمریکییەکان، تۆمەتبارەکە لەلایەن دانیشتوانی ناوچەی وێست هیڵزەوە دەستبەسەرکرا و دواتر لەلایەن بەشی پۆلیسی لۆس ئەنجلۆسەوە دەستگیرکرا، گومان دەکرێت بە ئەنقەست ئاگری کینێثی کردبێتەوە، کە بووە هۆی سووتانی  زیاتر لە 800 دۆنم زەوی و چۆڵکردنی ناوچەکانی وەک کاڵاباساس و هیدن هیڵز.

جگە لەوەش، هێزەکان 20 کەسیان دەستگیرکردووە بەهۆی تاڵانکردنی ئەو موڵکانەی کە بەهۆی ئاگرکەوە زیانیان بەرکەوتووە.

لێکۆڵینەوەکان لە هۆکاری ئاگرکەوتنەوەکانی دیکە، لەوانەش ئاگرکەوتنەوەکانی پالیسایدس و ئیتۆن بەردەوامە و دەسەڵاتداران پێشبینی ئەگەری جۆراوجۆر دەکەن،  کە لە پاڵ گۆڕانکاری کەشوهەوا و هۆکارە ژینگەییەکانەوە ئاگر کردنەوەی ئەنقەستیش یەکێکی دیکەیە لە ئەگەرەکان.

دۆخەکە هێشتا مەترسیدارە و هەوڵەکان بەردەوامن بۆ کۆنتڕۆڵکردنی ئاگرەکان.