هەولێر ئەمانەی لە بەغدا نەهێشت

ئەحمەد عەبدوڵا

ئێوارەی ئەمڕۆ یانەی هەولێر لە گەڕی 31ی خولی نایابی عێراق بە سێ گۆڵ بەرامبەر گۆڵێک لە یانەی بەغدای بردەوە و سەمیر بابۆش یەکەم یاری خۆی لەگەڵ یانەکە بردەوە.

یارییەکە بە هێرشەکانی یانەی ئەمانە دەستیپێکرد و سەرەتا یارییەکەیان کۆنتڕۆڵکردبوو تا شێرکۆ کەریم کاپتنی یانەی هەولێر لەسەر شێوازی یاریزانە جیهانییەکان بە لێدانێکی راستەوخۆ تۆڕی یانەی ئەمانەی بەغدای هەژاند و دەرگای گۆڵکردنی کردەوە.

یارییەکە بەردەوام بوو تا محەمەد قاسم هێرشبەری هەولێر تۆپێکی بەرزی لە مەکەنزی وەرگرت و بە لێدانی سەر لە خولەکی 68 گۆڵی دووەمی تۆمار کرد و ئەنجامەکەی بۆ هەولێر گەورە کرد و هەر هەمان یاریزان لە کۆتا خولەکەکانی یارییەکە گۆڵی سێیەمیشی کرد.

ئەسهەر عەلی لە خولەکی 91 تاکە گۆڵی یانەی ئەمانەی لە یارییەکە تۆمار کرد و یارییەکە سێ گۆڵ بەرامبەر یەک گۆڵ بۆ هەولێر کۆتایی هات.

دوای دۆڕانەکەی بەرامبەر یانەی زاخۆ، ئەم یارییە دووەم یاری و یەکەم بردنەوەی سەمیر بابۆی راهێنەری نوێی هەولێر بوو کە لە پێشمەرگەی هەولێرەوە پەیوەندی بە یانەکەوە کردووە.

ئەم بردنەوەیە حەوتەمین بردنەوەی یانەی هەولێر بوو و یانەکە بە ئەنجامدانی 29 یاری 31 خاڵی کۆکردووەتەوە و لە ریزبەندی 14ی خولەکەیە و دوو یاری دواخراویشی ماوە.

هەولێر ئەمساڵ بە دۆخێکی خراپدا تێدەپەڕێت و لەم مانگەدا دەستەی بەڕێوەبردنی یانەکە دەستیان لە کار کێشایەوە و دەستەیەکی کاتی بۆ بەڕێوەبردنی یانەکە پێکهێنرا.