رێڕەوى راکردنیشى بۆ دروست دەکرێت
پارکی ئازادی نۆژەن دەکرێتەوە
964+
دیلان محەمەد جەزا
هەڵمەتی نۆژەنکردنەوەی پارکی ئازادی سلێمانی دەستیپێکردوە و بڕیارە سەرجەم یارییەکان بگۆڕدرێن و شەقامەکانى پارکەکە قیرتاو بکرێتەوە.
بەکر مستەفا، لێپرسراوی پارکی ئازادی بە 964ـى وت، دەستکراوە بە نۆژەنکردنەوەی چەند بەشێکی پارکی ئازادی و ئێستا ئەو یاریانەی تایبەتن بە منداڵان لادەبرێن و یاری نوێ دادەنرێن.
“چاوەڕێین سێ سێتی یارییە وەرزشیەکانمان بەدەست بگات، لەبەر ئەوەی زۆرێک لەو یارییە وەرزشیانە شکاون و کەڵکی بەکارهێنانیان نەماوە”، بەکر مستەفا واى وت.
وەک باسى دەکات، لە نۆژەنکردنەوەکەدا سیستمی رووناکردنەوەی ناو پارکەکە چاک دەکرێت و سێ شەقامیش قیرتاو دەکرێنەوە و کربستۆنەکانی بۆیاخ دەکرێنەوە.
لەبارەى رێرەوى راکردنەکەوە، بەکر مستەفا روونى کردەوە کە هەوڵ هەیە بۆ چاککردنى رێڕەوەکە و چەند سێتێکى یارى تێنس دانراوە و یەکێک لە دەریاچەکانی ناو پارکەکەش چاک دەکەن.
پارکی ئازادی لە سلێمانی رووبەرەکەی 176 دۆنمە و رۆژانە خەڵکی سلێمانى و گەشتیاران سەردانى دەکەن و سیمایەکى جوانى بە شارەکە بەخشیووە.
پێداچوونەوە: وریا فەتاح