![خاوەن خانەکانی عەلوەی رۆژئاوا داوای چارەسەر لە ژووری بازرگانیی سلێمانی دەکەن](https://ku.964media.com/storage/2022/12/IMG_7488-1024x768.jpg)
وێنە - عەلوەی رۆژئاوای سلێمانی - تایبەت بە +964
دەیانەوێت ببووژێتەوە
خاوەن خانەکانی عەلوەی رۆژئاوا داوای چارەسەر لە ژووری بازرگانیی سلێمانی دەکەن
964+
پێشەوا محەمەد
خاوەنی دوکان و خانەکانی عەلوەی رۆژئاوای سلێمانی سکاڵای خۆیان بردووەتە ژووری بازرگانیی سلێمانی و داوای چارەسەرکردنی کێشەکانیان و کردنەوەی دەکەن.
ئەگەرچی لە ساڵی 2022ـەوە عەلوەی رۆژئاوای سلێمانی کراوەتەوە، بەڵام ئاوەدان نەبووەتەوە و دوکان و خانەکانی داخراون، ئەوەش کێشەی ئەوانەیە لە عەلوەکە موڵکیان کڕیوە و پێشتر لە عەلوەکانی دیکەی سلێمانی کاریان کردووە.
کامەران ئیبراهیم، کە خاوەن خانە لە عەلوەی سلێمانی و لەو لیژنەیەدا بووە چوونەتە ژووری بازرگانیی سلێمانی بە 964ـی راگەیاند، عەلوەکە دەیان کێشەی هەیە، دوکانەکانی زۆرن و بڕیار نەبوو هێندە زۆر بن، کەرتەکان بە نزیکەی 30 دەفتەر دۆلار فرۆشران و هەر دوکانێک زیاتر لە پێنج دەفتەر دۆلار کەوت و ئەو عەلوە گەورەیەش بیرێکی ئاوی نەبوو.
وتیشی، “داوامان لە ژووری بازرگانیی سلێمانی کرد بەدوای کێشەکانماندا بێت و چارەسەریان بکەن تا عەلوەکە بە تەواوی ببووژێتەوە و کاری تێدا بکرێت و میوە و سەوزەی سلێمانی لەوێوە ئاڵوگۆڕی پێبکرێت و ئەوانیش بەڵێنی هاوکاری و بەدواداچوونیان دا”.
“دووریی لەناو شار هۆکارێکی گەورەی شکستی عەلوەکەیە، چونکە بەقاڵەکان بۆ گەیشتنیان بەوێ دەبێت بەنزینێکی زۆر بسووتێنن و ئامادەی ئەو هاتوچۆیەش نین”، ئەوەش قسەی کامەران ئیبراهیمە.
بازاڕی عەلوەی رۆژئاوای سلێمانی، لە تاسڵوجەی سلێمانی و لە نزیک کارگەی چیمەنتۆکە دروستکراوە و رووبەرەکەی 116 دۆنمە، 205 نووسینگە و 109 دوکان لەخۆ دەگرێت، جگە لەوانەش پڕۆژەکە مزگەوت، ئوتێل، رێستورانت و یاریگای هەیە.