وێنەی دوو تۆمەتبارەکە لای پۆلیس - وێنە: پۆلیسی سلێمانی
لە سلێمانییەوە چووبوونە ئەوێ
لە شارەزوور دوو “دز” دەستگیر کران
964+
پێشەوا محەمەد
پۆلیسی بنکەی شارەزوور دوو تۆمەتباریان دەستگیر کرد، کە بە وتەی خۆیان پێشینەی تاوانیان هەبووە.
بەپێی راگەیەندراوێکی پۆلیسی پارێزگای سلێمانی، ئەو دوو کەسە لە شاری سلێمانی دزییان کردووە و بە نیاز بوون لە قەزای شارەزووریش هەمان کار بکەن.
لە راگەیەندراوەکەدا هاتووە، “له كاتی گه‌ڕان و دانانی بازگه‌ی كاتی هێزه‌كانی پۆلیسدا، له لایه‌ن مه‌فره‌زه‌كانی بنكه‌ی پۆلیسی شاره‌زووره‌وه گومان خرایه سه‌ر دوو تۆمه‌تبار، دوای ده‌ستگیركردنیان و له كاتی لێكۆڵینه‌وه‌كاندا هه‌ردوو تۆمه‌تبار دانیان به‌وه‌دا نا كه به مه‌به‌ستی دزیكردن چوونه‌ته قه‌زای شاره‌زوور”.
تۆمەتبارەکان لای پۆلیس ئاشکرایان کردووە، پێشتر لە شاری سلێمانی ماتۆڕسکیل و سندووقی خێری مزگەوتیان دزیوە.
“هەردوو تۆمەتبارەکە له به‌رده‌م دادوه‌ردا دانیان به تاوانه‌كه‌یاندا ناوه و ئێستا به بڕیاری دادوه‌ر و به‌پێی ماده‌ی 446 له یاسای سزادان راگیراون و لێكۆڵینه‌وه‌كان لەگەڵیاندا به‌رده‌وامه”، راگەیەندراوەکەی پۆلیسی سلێمانی وادەڵێت.
مادەی 446 لە یاسای سزادانی عێراقی تایبەتە بە دزیکردن، کە بەندکردن یان سزادانی ماددی دەیگرێتەوە.