سلێمانی رووداوەکانی هاتوچۆ کەمیان کردووە

دیلان محەمەد جەزا -سلێمانی

لە سلێمانی، بەهۆی هۆشیاری شوفێران و پابەندبوونیان بە رێنماییەکان هەم ژمارەی رووداوەکانی هاتوچۆ و هەمیش ژمارەی قوربانییەکان لە 2022ـدا کەمیان کردووە.

بەپێی ئەو ئامارانەی +964 لە هاتوچۆی سلێمانی دەستی کەوتووە، لە ساڵی 2022 هەزار و 44 رووداوی هاتوچۆ لەو شارەدا روویانداوە، بەو هۆیەوەش 174 کەس گیانیان لەدەست داوەو سێ هەزار و 843 کەسیش بریندار بوونە.

بەھمەن عەبدوڵلا، وتەبێژی ھاتوچۆی سلێمانی بە +964ـی وت “هۆکاری کەمبوونەوەی ژمارەی رووداوەکانی هاتوچۆ پەیوەندییان بە هۆشیاری شۆفێران و پابەندبوونیان بە رێنماییەکانی هاتوچۆوە هەیە”.

ئەو ئامارە بەراورد بە ئاماری 2021 هەم لە ئاستی ژمارەی رووداوەکان و هەمیش ژمارەی قوربانییەکان کەمی کردووە.

لە 2021ـدا، هەزارو 240 رووداوی هاتوچۆ روویانداوەو بەهۆیەوە 231 کەس گیانیان لەدەست دابوو، هەروەها سێ هەزار و 849 کەسیش بریندار ببوون.