چەند مادەیەکی بەشە خۆراک لای بریکارێکی خۆراک - وێنە :964
تا دوو مانگی دیکە
بریکارەکانی خۆراک دەتوانن بە کارتی یەکتری پارە بدەن
964+
پێشەوا محەمەد
بەڕێوەبەرایەتیی بازرگانیی سلێمانی رایدەگەیەنێت، بریکارەکانی خۆراک دەتوانن بە کارتی یەکتری پارەکانیان بدەنە بەڕێوەبەرایەتییەکە و بەشە خۆراکیان بۆ دابەزێندرێت.
بەهۆی نەبوونی کارتی بانکییەوە، تا ئێستا کەمتر 60%ـی ناو سلێمانی و دەوروبەری بەشە خۆراکی مانگی دوویان وەرگرتووە.
کامەران فەتاح، بەڕێوەبەری بازرگانیی خۆراکی سلێمانی بە 964ـی وت، “هەتا دوو مانگی تر بۆ ئەوەی دابەشکردنی بەشەخۆراک دوانەکەوێت بریکارەکان دەتوانن بە کارتی یەکتری و لە هەژماری بانکیی یەکێکیانەوە پارەی مانگانەیان بدەنە بەڕێوەبەرایەتیی بازرگانیی خۆراک”.
وتیشی، “بڕیارەکە هی وەزارەتی بازرگانیی عێراقە و دەبێت سەرجەم بریکارەکان لە رێگەی هەژماری بانکییەوە حسابەکانیان بدەن”.
لەناو شاری سلێمانی و دەوروبەری سێ هەزار و 246 بریکار هەن و دوو ملیۆن و 74 هەزار و 91 هاوڵاتیش بەشە خۆراک وەردەگرن.
هەر هاوڵاتییەک بۆ وەرگرتنی بەشەخۆراک بڕی هەزار دینار دەداتە بریکار و ئەوانیش 495 دیناری بۆ بەڕێوەبەرایەتیی بازرگانیی خۆراک دەگێڕنەوە.
“ئەو بەشە خۆراکەی ئێستا هی مانگی دووە بە لیستی مانگی سێ، سبەینێ و دووسبەی دابەشکردنی بەشە خۆراکەکە لەناو شاری سلێمانی و دەوروبەری دەگەیەنینە 80%”، کامەران فەتاح وای وت.