زیانەکان چى بوون؟
964 ئامارى زەرەر و زیانەکانى لافاوەکەى دهۆک ئاشکرا دەکات
964+
زەید کۆچەر-دهۆک
جگە لە گیانلەدەستدانى سێ کەس و برینداربوونى 11 کەسى دیکە، 50 ئۆتۆمبێل و 150 ماڵ بەهۆى لافاوەکەى ئەمڕۆى دهۆک زیانیان پێگەیشتووە.
بێوار عەبدول عەزیز، بەرپرسی راگەیاندنی بەرگری شارستانی دهۆک داتای نوێى زەرەر و زیانەکانى لافاوەکەى دهۆکى بۆ 964 ئاشکرا کرد و دەردەکەوێت، بەهۆى لافاوەکەى ئەمڕۆ، دوو کەس گیانیان لەدەستداوە و 11 کەسیش بریندارن، 120 کەسیش لە خنکان رزگارکراون.
لەبارەى زیانە مادییەکانیشەوە، بەرپرسى راگەیاندنى بەرگرى شارستانى دهۆک ئاشکراى کرد، 150 ماڵ زیانیان پێگەیشتووە و ئاویان تێچووە، 50 ئۆتۆمبێلیش کەوتوونەتە ژێر ئاوەوە و لافاوەکە بردوونى و زیانى پێگەیاندوون.
بەهێزى لافاوەکە بەشێوەیەک بووە 10 ماڵ بە تەواوەتى رووخاون، گەشتووگوزارى دهۆکیش نۆ هۆتێلى بۆ 242 خێزان ئامادەکردووە کە بەهۆى لافاوەکەوە بێماڵ بوون.
داڕشتنەوە: وریا فەتاح