یادى کیمیاباران
کەرکوک بۆ هەڵەبجە خۆى رەشپۆش کرد
964+
کاروان ساڵحى- کەرکوک
مانگرتوانی چادرگەی گەڕەکی نەورۆزى شارى کەرکوک، یادی کارەساتى هەڵەبجەیان کردەوە و 120 پارچە پەڕۆی رەشیان لەسەر 120 خانووى گەڕەکەکە بەرز کردەوە.
ماوەى 75 رۆژە دانیشتووانى گەڕەکى نەورۆز، دژى داگیرکردنى ژمارەیەک خانووى دانیشتوانى گەڕەکەکە لەلایەن سوپاى عێراقەوە، گردبوونەتەوە و چادرگەى ناڕەزایەتییان هەڵداوە.
ئەمڕۆ لە یادى کارەساتى هەڵەبجەدا، دانیشتووانى مانگرتووى گەڕەکەکە بە جلوبەرگى رەش و بە بەرزکردنەوەى ئاڵاى رەش لەسەر ماڵەکانیان، یادەکەیان بەرز راگرت.
هێمن قاسم، نوێنەرى مانگرتوانى گەڕەکەکە بە 964ـى وت،”بۆ ئەمڕۆ بە جلوبەرگى رەش و ئاڵاى رەشەوە یادى هەڵەبجە دەکەینەوە، لە نەورۆزدا ئاڵا رەشەکان لادەبەین و لە جێگایان ئاڵاى کوردستان بەرز دەکەینەوە”.
“ئەوەى ئێتستا بەرامبەر دانیشتووانى گەڕەکى نەورۆز دەکرێت، درێژکراوەى هەمان سیاسەتە کە بەرامبەر هەڵەبجە کراوە”، هێمن قاسم واى وت.
پێداچوونەوە: وریا فەتاح
