محەمەد شیاع سودانی سەرۆک وەزیرانی عێراق. وێنە:ئاژانسی هەواڵی عێراق.
داواى لێکۆڵینەوە دەکات
سودانى لەسەر هێرشە درۆنییەکەى سەر بنکەیەکی هێزەکانی پێشمەرگە هاتە دەنگ
964+
وریا فەتاح
سەرۆک وەزیرانى عێراق، لەسەر هێرشەکەى درۆنییەکەى شەوى رابردووى سەر بنکەیەکى هێزەکانى پێشمەرگە لە پیرمام هاتە دەنگ و داواى لێکۆڵێنەوەى گشتگیر دەکات.
ئاژانسى هەواڵى عیراق بڵاوى کردەوە، محەمەد شیاع سودانى، سەرۆک وەزیران و سەرۆکى هێزە چەکدارەکانى عێراق، هێزە ئەمنییەکانى راسپاردووە،”لێکۆڵینەوەیەکى گشتگیر لەسەر هێرشە تاوانکارییەکەی” شەوى رابردوو بکەن، کە کرایە سەر بنکەیەکى هێزەکانى پێشمەرگە لە پیرمام.
سودانى داواى کردووە، ئەنجامدەرانى هێرشەکە ئاشکرا بکرێن و بۆ ئەو مەبەستەش بە هەماهەنگى لەگەڵ هێزە ئەمنییەکانى هەرێمى کوردستان، لێکۆڵینەوەکان ئەنجام بدرێن.
ئەوەش لە کاتێکدایە، کەمێک پێش ئێستا مەسرور بارزانى، سەرۆک وەزیرانى هەرێم راگەیەنراوێکى بڵاوکردەوە و رایگەیاند، دەبێت حکومەتی فیدراڵ هەر هێرشێک بۆ سەر هەرێمی کوردستان بە هێرش بۆ سەر هەموو عێراق ببینێت و هەڵوێستی جددی هەبێت و بە کردەوە وەڵام بداتەوە.
شەوى رابردوو بە دوو درۆنى بۆمبڕێژکراو هێرشکرایە سەر بارەگایەکى هێزى پێشمەرگە لە سنورى پیرمام، بەپێى راگەیەنراوێکى وتەبێژى حکومەتیش، هێرشەکە هیچ زیانێکى گیانى لێنەکەوتووەتەوە.
