هۆکارەکان زۆرن
بۆچى بازاڕى دۆلار ناجێگیرە؟
964+
وریا فەتاح
نزیکەى هەفتەیەکە، بەهاى دۆلار بەرامبەر دینارى عێراقى ناجێگیرە و دواى دابەزینەکەى دوێنێ، ئەمڕۆ جارێکى دیکە بەرەو بەرزبوونەوە هەنگاوی نا، وتەبێژى بازاڕى دۆلارەکەى سلێمانیش دەڵێت: رێکارەکانى بانکى ناوەندى بەو ئاراستەیەن، دۆلار لە ساڵى نوێدا روو لە دابەزین بکات.
جەبار گۆران، وتەبێژى بازاڕى دۆلارەکەى سلێمانى قسەى بۆ 964 کردووە و دەڵێت: فاکتەرە دەرەکییەکان، هۆکاریکى سەرەکین بۆ بەرزبوونەوەى بەهاى دۆلار، بۆ نموونە دوێنێ نرخى دۆلار بۆ 148 هەزار و 750 دینار دابەزى، بەڵام ئەمڕۆ هێرشى مووشەکیى ئەمەریکا بۆ سەر حیزبوڵاى عێراقى دۆلارى بۆ 152 هەزار بەرزکردەوە.
بە وتەى جەبار گۆران، لە پاڵ فاکتەرە دەرەکییەکان، خواست و بەرژەوەندیى هەندێ لایەنى ناوخۆ لە بەرزى بەهاى دۆلاردایە و بە ئاشکرا یاریى بەوەوە دەکەن و دەیانەوێت دۆلار بەرز ببێتەوە، بە تایبەت بانکەکان کە ئەجێنداى سیاسییان هەیە، بۆیە بەردەوام بەهاى دۆلار ناجێگیر و بەرزە.
ئەو پێى وایە، رێکار و هەنگاوەکانى بانکى ناوەندى پێشکەوتوو و پێویستن، بەڵام فاکتەرە دەرەکى و خواستە ناوخۆییەکان هۆکارن، کە بەردەوام دۆلار بەرەو بەرزبونەوە بڕوات.
بە پێى بڕیارەکان، لە ساڵى نوێدا مامەڵە ناوخۆییەکان بە دینار ئەنجام دەدرێن، بۆیە وتەبێژى بازاڕى دۆلارەکە دەڵێت: ئەو هەنگاوە ئاماژەیەکى روونە بۆ ئەوەى خواست لەسەر دۆلار کەم ببێتەوە، چونکە لەو کاتەدا تەنیا بازرگانەکان و ئەو کەسانەى گەشت دەکەن پێویستیان بە دۆلار دەبێت.
ساڵى نوێ دۆلار دادەبەزێت؟
“ئەگەر پێشهاتێکى چاوەڕوان لە ساڵى نوێدا روونەدات و دۆخى سیاسى بە ئاراستەى سەقامگیرى بێت، بێگومان بەهاى دینارى عێراقى بەرامبەر دۆلار بەهێز دەبێت”، وتەبێژى بازاڕى دۆلارەکە واى وت.
ئەوەش لە کاتێکدایە، دوێنێ بەهاى 100 دۆلار دابەزى بۆ 148 هەزار و 750 دینار، بەڵام ئێوارەى ئەمڕۆ، لە سەرووى 153 هەزار دینارەوە مامەڵەى پێوەکرا.