رێگە بە 31 پاسی مامۆستایانی ناڕازی نادرێ بگەن بە بەغدا
ئەحمەد مستەفا
بەرەبەیانی ئەمڕۆ لە بازگەی چیمەنی دەروازەی کەرکوک، رێگە لە 31 پاسی مامۆستایان گیراوە بگەن بە بەغدا.
مامۆستاکان نوێنەرایەتی دەستەی ناڕازی شارەکانی هەرێمی کوردستان بوون، لە سلێمانی، هەڵەبجە، راپەڕین و گەرمیان، ئامانجیان وابوو بچنە بەغدا و لە مەیدانی ئازادی گردببنەوە.
ئەمڕۆ یەکشەممە 26.11.2023 عوسمان گوڵپی، لە ئەنجومەنی مامۆستایانی ناڕازی بە 964ی وت، رێگە نەدانەکە لە کاتێکدایە، لەگەڵ وەزارەتی ناوخۆی عێراق و دەزگا ئەمنییەکانی حکومەتی عێراق هەماهەنگی کرابوو، بەڵام دواتر فەرمان بەبازگەکان کراوە رێگری بکەن.
مامۆستاکان چواری بەرەبەیانی یەکیان گرت و وابڕیار بوو کاتژمێر 11:00ی پێش نیوەڕۆ بگەن بە بەغدا، بەڵام هێشتا لە بازگەی چیمەن ماونەتەوە.
ئەو بازگەیە لەلایەن پۆلیسی فیدڕاڵی بەڕێوەدەبرێت، بە وتەی عوسمان گوڵپی بێت “ئەم رێگرییە مامۆستاکانی سورتر کردووە و بەردەوام وشەی بایکۆت دەڵێنەوە” کە زیاتر لە دوو مانگە دراوە لە یەخەی پڕۆسەی خوێندن لە چەند ناوچەیەکی هەرێمی کوردستان.