پەروەردەی کەرکوک بڕیاری قەدەغەکردنی 10 پیتی کوردی هەڵوەشاندەوە

ژووری هەواڵ

بەڕێوەبەرایەتی گشتی پەروەردەی کەرکوک قەدەغەی لەسەر بەکارهێنانی چەند پیتێکی زمانی کوردی هەڵگرت کە لەکاتی تۆمارکردنی ناوی خوێندکاران بەکاردەهاتن و لە زمانی عەرەبیدا نین.

پیتەکان 10 دانەن و پێکهاتوون لە: ژ، پ، ڤ، چ، گ، ۆ، ڵ، ڕ، ێ، ک.

لە 9ی تشرینی دووەمی 2023، بەڕێوەبەرایەتی پەروەردەی کەرکوک داوای لە خوێندنگاکانی سنووری بەڕێوەبەرایەتییەکەی کرد، لە ئامادەکاریی لیستی ناوی خوێندکارانی پۆلی شەشی سەرەتایی، لەبری ئەو 10 پیتە کوردیە، ھاوتا عەرەبیەکانیان بەکاربھێنرێن.

بڕیارەکەی پەروەردەی کەرکوک ناڕەزایەتی زۆری لێکەوتەوە، بۆیە دوای كەمتر لە 24 كاتژمێر، پەروەردەی كەركوك بە نووسراوك ئەو بڕیارەی كشاندەوە و رایگەیاند، پاش پەیوەندیكردن بە لایەنە پەیوەندیدارەكان، لە پرۆژەی تیانووسی ئەلیكترۆنی پیتە كوردییەكان زیاددەكرێـت.