کارکردن لە دەریاچەیەکی پارکی ئازادیدا - وێنە: شارەوانی سلێمانی
بۆ ئاودان و ئاودێری
دەریاچە سەرەکییەکەی پارکی ئازادی فراوان دەکرێت
964+
پێشەوا محەمەد
دەریاچەی سەرەکیی ناو پارکی ئازادی فراوان دەکرێت و ئامانجیش لێی زیاتر گلدانەوەی ئاوە بۆ وەرزی ئاودێری.
ئێستا چەند رۆژێکە ئیشکردن لە دەریاچەکەدا دەستیپێکردووە و بڕیار وایە تا مانگێکی دیکە تەواو بکرێت.
لەناو پارکی ئازادی دوو دەریاچە هەن و پێشتریش ئەوەی دیکەیان چەند مەترێک قووڵ کرا.
بەهرۆز سالار، بەڕێوەبەری باخچەکانی سلێمانی بە 964ـی راگەیاند، دەریاچەکە دەکەن بە سێ هێندە و ژێرەکەشی یان کۆنکرێت دەکەن یان رەبەلی دەکەن، “چونکە ئێستا گڵە و ئاو زۆر گل ناداتەوە”.
وتیشی، “ئەو دەریاچانە ئەگەر گەورە بن دەتوانین ئاویان تێدا گل بدەینەوە و بۆ ئاودان و ئاودێریی باخەکە سوودیان لێ ببینین”.
پێشتر پارکەکە بە چەند قۆناغێک سەوزایی و رێگاوبان و ئامێرەکانی یاریکردنی منداڵانەکانی و پەرژینەکەی نۆژەن کرانەوە.
پارکی ئازادی لە سلێمانی رووبەرەکەی 176 دۆنمە.
