کاسبکارانی عەلوەی کەلار تاقەتیان نەما بۆ پێنج کیلۆ تەماتە پێنج هەزار بدەن 

964+

هونەر فارس – گەرمیان

دوای بێ ئومێد بوون لە چارەسەرکردنی گرفتەکەیان، کاسبکارانی عەلوەی کەلار ئەمڕۆ نوسراوێک ئاراستەی لایەنە پەیوەندیدارەکانی شارەکە دەکەن و داوای بەدەمەوە هاتنی کێشەکانیان دەکەن.

بەهۆی زیادکردنی پارەی خزمەتگوزاری و وەرگرتنی پارە بە ناوی پشکنینەوە لەو ئۆتۆمبیلانەی کە بەمەبەستی بەتاڵکردنی بارەکانیان روو لە عەلوەی کەلار دەکەن، کاسباکانی عەلوەکە ماوەی پێنج رۆژە نەچونەتەوە شوێنەکانیان و لە دەرەوەی عەلوەکە بەرهەمەکانیان ساغدەکەنەوە.

ئەوانەی کە خاوەن قاتعن لە عەلوەکەدا نیگەرانن لە زیاد کردنی پارەی خزمەتگوزاری، 964 قسەی لەگەڵ کردوون و دەڵێن “کۆمپانیا دەیەوێت پارەی خزمەتگوزاریمان لە 125 هەزارەوە بۆ 175 هەزار زیاد بکات”.

ئەوانەشی کە جوتیارن یاخود شۆفێری بارهەڵگرن و بەمەبەستی ساغکردنەوەی بەرهەم روو لە عەلوەکە دەکەن، دەڵێن: بۆ هەر ئۆتۆمبیلێکی بچوک حەوت هەزار و بۆ هەر بارهەڵگرێکی گەورە 15 هەزارمان لێ وەردەگیرێت.

964 دەزانێت، دوای بێ ئومێد بوونیان لە چارەسەرکردنی گرفتەکەیان، ئەمڕۆ کاسبکارانی عەلوەکە نوسراوێک ئاراستەی لایەنە پەیوەندیدارەکان دەکەن کە خۆی لەم خاڵانەدا دەبینێتەوە:

-دیاریکردنی خاوەنداریەتی عەلوەکە، کە تاکو ئێستا خاوەنداریەتیەکەی دیار نییە.

-نەمانی پشتگیری باج کە لەلایەن کۆمپانیای سەبجەوە لێیان وەردەگیرێت.

-دیاریکردی پارەی خزمەتگوزاری بەپێی یاسا و جگە لە کۆمپانیای پشکنین کەس پارە وەرنەگرێت.

-لیژنەی عەلوە بگۆڕدرێت و کاسباکارانی عەلوە لەلایەن لایەنە پەیوەندیدارەکانەوە کۆبوونەوەیەکیان بۆ رێکبخرێت.

964دەزانێت، عەلوەی کەلار خۆی لە 116 قاتع دەبینێتەوە و لە ساڵی 2014وە دروستکراوە و ماوەی سێ ساڵە کاسبکاران کاری تێدا دەکەن، بەڵام تا ئێستا خاوەنداریەتی عەلوەکە دیار نییە و لایەنە پەیوەندیدارەکانیش خۆیان بەرامبەر گرفتەکانی عەلوەکە بێدەنگ کردووە.

پێداچوونەوە: توانا نەقی