22 ملیۆن دۆلار بۆ ئاوەدانکردنەوەی شەنگال تەرخان کرا

964+
زەید کۆچەر – دهۆک

بڕیارە رێکخراوێکی ئەمریکی چەند پڕۆژەیەکی خزمەتگوزاری و خانووبەرە لە شەنگال جێبەجێ بکات و  22 ملیۆن دۆلاری بۆ تەرخان کردووە.

عەلی عومەر کەعبۆ، جێگری پارێزگاری نەینەوا بۆ کاروباری ئاوارە و رێکخراوەکان بە 964ی وت، رێکخراوی “یوئێن ئۆپی ئێس” پێشتر چەند پڕۆژەیەکی لە پارێزگای ئەنبار جێبەجێ کردووە و ئێستا بڕیاریداوە 22 ملیۆن دۆلار بۆ شەنگال خەرج بکات.

جێگری پارێزگاری نەینەوا ئەوەش دەڵێت، نیوەی ئەو پارەیە بۆ ئاوەدانی خانووبەرە تەرخان دەکرێت، نیوەکەی دیکەی بۆ پڕۆژەی خزمەتگوزاری دەبێت، بڕیارە چەندین بیری ئاو لێبدرێت، خزمەتگوزاری ئاو و کارەبا و تەندروستی و پەروەردە ئەنجام دەدرێن.

رێکخراوە ئەمریکییەکە ئەمساڵ لە گوندی “قاپوسی” لە باشووری قەزای شەنگال 90 خانووی ئاوەدان کردووەتەوە و رادەستی خاوەنەکانیان کراوەتەوە.

بە گوێرەی زانیارییەکانی جێگری پارێزگاری نەینەوا، بڕیارە 50 خانوو لە گوندی حەردان و 40 خانوو لە گوندی دهۆلا ئاوەدان بکاتەوە.

پێداچوونەوە: فەهمی نەبی