برنجەکانی بازاڕ کێشەی نیە
ئەو برنجەی لە بازاڕەکاندا هەیە راستییە
+964
دیلان محەمەد جەزا
دوا بە دوای بڵاو بوونەوەی ڤیدیۆی دروستکردنی برنج لە ماددەی پلاستیکی، پسپۆڕێک دەڵێت، ئەو جۆرە برنجەی لە کوردستاندا نییە و ئەوەی ھەیە لە بازاڕدا برنجی سروشتییە.
دکتۆر بێستون عومەر پسپۆڕی بایۆتەکنەلۆژیای رووه‌ك، به تۆڕی 964ی وت، ھەر برنجێک ھاوردەی ھەرێمی کوردستان دەکرێت، بە باشترین ئامێر پشکنینی بۆ دەکرێت و دڵنیان لەوەی برنجی تەواوە و سەرجەم پێکھاتە خۆراکییەکانی تێدایه.
وتیشی، ئەو ڤیدیۆیەی بڵاوبووه‌تەوە تەنیا بۆ بابەتی ریسایکلینە و لەسەر شێوەی برنج دروستی دەکەن، بۆ ئەوەی جێگه‌یەکی کەم بگرێت، دواتر لە دروستکردنی پێداویستی پلاستیکی بەکاردێت و ھیچ پەیوەندییەکی بە برنجەوە نییە.
ئێستا دوو جۆر برنج لە کوردستاندا هه‌یه، یەکەمیان ئینتیکا، ئەو برنجە درێژەیە لە بازاڕەکاندا و نیشتمانی چاندنی وڵاتانی ھیندستان و چین و وڵاتانی رۆژھەڵاتی ئاسیایە، جۆری دووەم جاپۆنیکایە، ئەو برنجە خڕەیە و نیشتمانەکەی وڵاتی ژاپۆنە.
دکتۆر بێستون عومەر هه‌روه‌ها ده‌ڵێت: “ھەردوو جۆرەکەی برنج پێکھاتەکانیان کاربۆھیدرات و دوو جۆر شەکرن، لە برنجی خڕدا جۆری شەکری ئەمیلۆ پیکتین بەرزە و لە برنجی درێژدا شەکری ئەمیلۆز پیکتین بەرزە.
پێداچوونه‌وه: ئه‌رسه‌لان عه‌بدوڵا