“هۆشداریی دەدەینە ئەو گرووپانەی ئاسایشی هەرێمی كوردستان دەكەنە ئامانج”

964+

ئەرسەلان عەبدوڵا

لە بارەی ئەو هێرشە درۆنییانەی كراوەتە سەر خاڵێكی پێشمەرگە لە سنووری پارێزگای دهۆك، ئەنجومەنی ئاسایشی هەرێمی كوردستان راگەیاندراوێكی بڵاوكردەوە.

ئەنجومەنی ئاسایش ئەمڕۆ سێشەممە 29.4.2025 راگەیاندراوێكی بڵاوكردەوە و ئاماژە بەوە دەكات، هێزی پێشمەرگە و هێزەکانی ئاسایشی ناوخۆ ئامادەن بۆ کاردانەوەی گونجاو بەرامبەر بە هەر هێرشێکی تێکدەرانە.

دەقی راگەیاندراوەكە:

دوێنێ و ئەمڕۆ بەیانی گرووپێکی تیرۆریستی، لە دوو هێرشی جیاوازدا، بە درۆن بنکەکانی هێزی پێشمەرگەیان لە سنووری پارێزگای دهۆک کردووەتە ئامانج و لە ئەنجامدا پێنج پێشمەرگە بریندار بوون.

بارودۆخی بریندارەکان باشە و پێشمەرگەکان ئامادەن بە ئیرادەیەکی پۆڵایین بەرپەرچی هەرجۆرە پیلان و هێرشێکی ناحەزان بدەنەوە.

لە کاتێکدا کە پرۆسەی ئاشتی لە باکوور و کۆنفرانسی یەکێتیی لایەنە کوردستانییەکان لە ڕۆژئاوا و پرۆسەی پێکهێنانی کابینەی نوێی حکومەتی هەرێم خەریکە بە ئەنجام دەگات، هەندێ لایەن و گرووپ هەوڵ دەدەن پرۆسەی ئاشتی و سەقامگیری لە دەڤەرەکەدا پەک بخەن.

ئێمە لە ئەنجومەنی ئاسایشی هەرێمی کوردستان وێڕای سەرکۆنەکردنی ئەم هێرشە تیرۆریستییانە، هۆشداری دەدەینە هەموو ئەو گرووپ و لایەنانەی ئاسایشی هەرێمی کوردستان دەکەنە ئامانج، هێزی پێشمەرگە و هێزەکانی ئاسایشی ناوخۆ ئامادەن بۆ کاردانەوەی گونجاو بەرامبەر بە هەر هێرشێکی تێکدەرانە.

ئەنجومەنی ئاسایشی هەرێمی کوردستان

29ی نیسانی 2025

ئەمڕۆ و دوێنێ بە درۆنی خۆكوژ، دوو جار هێرشكراوەتە سەر خاڵێكی پێشمەرگە لە گوندی بلاڤە لە سنووری قەزای ئامێدی و بەهۆیەوە پێنج پێشمەرگە بریندار بوون.

درۆنێک بە خاڵێکى نوێى پێشمەرگەدا تەقییەوە؛ دوو پێشمەرگە بریندارن