لەسەر رێگای پێنجوێن – سەیدسادق تانکەرێک نەوتی رەشی بەسەر جادەدا رشت و شۆفێرەکەی دەستگیرکرا - وێنە: پۆلیسی دارستان و ژینگەی سلێمانی
لەسەر رێگای پێنجوێن - سەیدسادق شۆفێرێک قۆڵبەست کرا
هەر شۆفێر تانکەرێک وریا نەبێ و نەوتی رەش بڕێژێت، دەستگیر دەکرێت
شۆڕش قادری
هەر شۆفێر تانکەرێک وریا نەبێ و نەوتی رەش بەسەر جادەدا بڕێژێت، دەستگیر دەکرێت و ئەمڕۆش لە ناڵپارێز شۆفێرێک قۆڵبەست کرا.
هێمن کەمەرخان وتەبێژی پۆلیسی دارستان و ژینگەی سلێمانی بە 964ـی وت، “ئەمڕۆ یەکشەممە 22.12.2024 لە لایەن مەفرەزەیەكی بنکەی پۆلیسی دارستانی ناڵپارێزەوە، لەسەر شەقامی سەرەکی نێوان پێنجوێن – سەیدسادق، شۆفێرێکی تانکەر دەستگیرکراوە و تانکەرکەش دەستی بەسەرداگیراوە”.
“ئەو تانکەرە رێژەیەکی زۆر لە نەوتی رەشی لەسەر شەقامەکەدا رشتبوو کە بووبوە هۆی مەترسی بۆ سەر ژیانی شۆفێران و ئۆتۆمبێلەکانی تر”، هێمن کەمەرخان وای وت.
ئاماژەی بەوەشکرد، پەڕاوی لێکۆڵینەوە بۆ ئەو رووداوە کراوەتەوە و بۆ وەرگرتنی رێکاری یاسایی رادەستی دادوەر کراوە.
هێمن کەمەرخان وتیشی، دەبێ شۆفێر تانکەرەکان وریا بن و هەر تانکەرێک نەوتی رەش بەسەر شەقام و جادەکاندا برێژێت، شۆفێرەکەی دەستگیر دەکرێت.
