ئاكرێ به‌ شێوازێكی جیاواز چاره‌سه‌رى زبڵ و پاشماوه‌كانى ده‌كات

964+

فەرهاد حەسەن

شاره‌وانیى قه‌زاى ئاكرێ، جیاواز له‌ شوێنه‌كانى دیكه‌ به‌شێوازێكی تایبه‌ت چاره‌سه‌رى ئه‌و زبڵ و پاشماوانه‌ى ده‌كات، كه‌ رۆژانه‌ له‌ كۆڵان و شوێنه‌ گشتییه‌كانى قه‌زاكه‌ى كۆیده‌كاته‌وه‌.

شێوازه‌كه‌ بریتیه‌ له‌ دروستكردنى حه‌وزێك، له‌سه‌ر رووبه‌رى 10 هه‌زار و 227 مه‌تر دوجا، كه‌ درێژییه‌كه‌ى 119 مه‌تر و نیو و پانییه‌كه‌شى 86 مه‌تر دوجایه‌ .

رۆژانه‌ هه‌رچی زبڵ و پاشماوه‌ى كۆكراوه‌ى ئاكرێ هه‌یه‌ ده‌خرێته‌ ناو ئه‌م حه‌وزه‌ دواتر له‌رێگه‌ى تیمه‌كانى شاره‌وانییه‌وه‌ هه‌ندێك ماده‌ى پاشماوه‌كان جیاده‌كرێته‌وه‌ و ئه‌وانه‌ى دیكه‌ش له‌ شوێنێكى تایبه‌ت ژێرخاك ده‌خرێن.

بڵند ره‌زا، سه‌رۆكى شاره‌وانیى ئاكرێ به‌ 964ـى راگه‌یاند، به‌ ماده‌یه‌كی تایبه‌ت ناو حه‌وزه‌كه‌ داده‌پۆشرێت، بۆ ئه‌وه‌ى كاریگه‌رییه‌ خراپه‌كانى ئه‌و پاشماوانه‌ زیان به‌ ژینگه‌ و خاكه‌كه‌ نه‌گه‌یەنێت، له‌ زستانیشدا ئاوى ئه‌و پاشماوانه‌ نه‌چێته‌ ناو خاكه‌وه‌.

وتیشی “ئه‌و مادانه‌ى له‌ناو پاشماوه‌كان كۆده‌كرێنه‌وه‌ سه‌رله‌نوێ به‌كارده‌هێندرێنه‌وه‌ بریتییه‌ له‌ 60% ـى ئه‌و پاشماوانه‌ و ئه‌وه‌شی ژێرخاك ده‌خرێت بریتییه‌ له‌ 40%”.

ئاماژه‌ى به‌وه‌شكرد، پڕۆژه‌كه‌یان له‌سه‌ره‌تاى دروستكردندایه‌ و له‌گه‌ڵ كۆمپانیایه‌ك گرێبه‌ستی سێ ساڵیان كردووه‌ كه‌ به‌ شێوه‌یه‌كى تۆكمه‌ و سه‌رده‌میانه‌ دروستی بكات و كار له‌ پڕۆژه‌كه‌ش بكات.

له‌ ئاكرێ بۆنى ئاوەڕۆ و زێراب گه‌ڕه‌كێكی هه‌راسان كردووه‌