دیمەنی بەشێک لە کێڵگە کشتوکاڵییەکانی پێنجوێن _ وێنە: 964
وەزیرەکەی خۆمان چییان بۆ دەکات؟
جوتیارانی پێنجوێن داوای راگرتنی هاتنی بەرهەمەکانی دەرەوە دەدەن
964+
ئەرسەلان عەبدوڵا
جوتیاری سنووری پێنجوێن داوا دەكەن رێگە لە هاوردەی بەرهەمی دەرەوەی هەرێمی كوردستان بگیرێت لەم وەرزەدا و بۆ ئەمەش چوونە لای وەزیری كشتوكاڵ.
ژمارەیەك لە جوتیارانی سنووری قەزای پێنجوێن كێشەی بەبازاڕكردنی بەروبوومەكانیان بردەلای وەزیری كشتوكاڵ بێگەر تاڵەبانی و پێیان راگەیاند، ئێستا شووتی، كاڵەك، خەیار و پیاز و بەرهەمەكانی دیكەیان دەتوانێت پێویستییەكانی بازاڕ دابین بكات و كوالێتیی بەرهەمەكانیشیان بەرزە، بۆیە داوایان كرد وەزیر دەسەڵاتەكانی بەكاربهێنێت و رێگە لە هاوردەكردنی بەرهەمی وڵاتانی دەوروبەر بگرێت.
كۆبوونەوەی جوتیارەكان و بێگەرد تاڵەبانی دوێنێ سێشەممە لە دیوانی وەزارەت بوو.
دوای گفتوگۆی نێوانیان، وەزیرەكەی خۆمان بڕیاری دا گفتوگۆ لەگەڵ وەزیری كشتوكاڵی عێراق بكات بۆ ئەوەی مەرزەكانی عێراق بەڕووی هاوردەكردنی ئەو بەرهەمانە دابخرێت، كە لە پێنجوێن و ناوچەكانی دیكە بە كوالێتییەكی باش دەتوانن پێداویستی بازاڕی عێراق و كوردستان دابین بكەن، تایبەتتر ئەو بەرهەمانەی ئاماژەیان پێكراوە.
هەروەها بڕیاردرا نووسراوێک ئاراستەی ئەنجومەنی وەزاری ئابووریی عێراق بکرێت و لەگەڵ سەرۆکی ئەنجومەنەكە گفتوگۆ بکرێت، بۆ ئەوەی بەزووترین کات مەرزەکانی ناوەڕاست و خوارووی عێراق دابخرێن تا جوتیارانی هەرێمی کوردستان زەرەرمەند نەبن، ئەمەش لە چوارچێوەی هەماهەنگی و هاوکاری هاوبەشی نێوان هەردوو وەزارەت، بەپێی رۆژژمێری کشتوکاڵیی نێوان هەردوولا.
نزیكەی هەموو هاوینێك جوتیارانی كوردستان و دەڤەری پێنجوێن بە تایبەتی، سەرەڕای بەرهەمهێنانی بەروبوومی زۆری كشتوكاڵی لە سەوزە و میوە، بەڵام كێشەی بەبازاڕكردنیان بۆ دێتەپێش، بە تایبەتی لە ناوچەكانی ناوەڕاست و باشووری عێراق، كە رێگرییان لێدەكرێت بەرهەمەكانیان بگەیەننە ئەو ناوچانە.
ساڵی رابردووش جوتیارانی پێنجوێن چوونە بەردەم وەزارەتی کشتوکاڵی عێراق و خۆپیشاندانیان ئەنجام دا، جگە لەوەش هەفتەی پێشوو بەشێک لە جوتیاران سەردانی بەغدایان کرد و لەگەڵ جێگری وەزیری کشتوکاڵ و چەند پەرلەمانتارێکی لیژنەی کشتوکاڵ کۆبوونەوە.
قەزای پێنجوێن خاوەنی زیاتر لە 81 هەزار دۆنم زەوی کشتوکاڵییە و ساڵانە بەرهەمە کشتوکاڵییە هاوینەییەکانی تێدا دەچێندرێت.
