“کابینەی نۆیەم زیاتر لە 15 ملیار دۆلاری بۆ پرۆژە خەرجکردووە”
964+
هاوبەش ئەبوبەکر – سلێمانی
لە سەرەتای دەستبەکاربوونی کابینەی نۆیەمی حکومەتی هەرێمی کوردستان تاوەکو ئێستا 296 پرۆژەی وەبەرهێنان بە بڕی زیاتر لە 15 ملیار دۆلار جێبەجێکراون و پەسەند کراون، بە قسەی فەرمانگەی میدیا و زانیاری..
فەرمانگەی میدیا و زانیاری حکومەتی هەرێمی کوردستان، ئەمڕۆ چوارشەممە رایگەیاند، کابینەی نۆیەم بڕی 15 ملیار و 273 ملیۆن و 173 هەزار و 64 دۆلاری بۆ 296 پرۆژەی وەبەرهێنان خەرجکردووە کە لە ساڵی 2019 تاوەکو 2023 پەسەند کراون و دەست بە جێبەجێکردنیان کراوە.
بەپێی ئاماری حکومەتی هەرێمی کوردستان، لە کابینەکانی دیکەی حکومەتی هەرێمی کوردستاندا 800 پرۆژە بە سەرمایەى 51 ملیار و 219 ملیۆن و 937 هەزار و 703 دۆلار پەسەند و جێبەجێ کراون.
لە ماوەی کابینەی نۆیەمدا زۆرترین پرۆژە لە هەولێر جێبەجێکراوە، بەڵام زۆرترین پارە بۆ پرۆژەکانی سلێمانی خەرجکراوە.
بۆ 31 پرۆژە لە سلێمانی زیاتر لە ملیارێک دۆلار و بۆ 39 پرۆژەی هەولێر نزیکەی 900 ملیۆن دۆلار خەرج کراوە.
پرۆژەکانی ساڵى 2022 بەم شێوەیە بەسەر پارێزگاکاندا دابەش کراون:
-پارێزگاى هەولێر: 39 پڕۆژە بە سەرمایەى 854 ملیۆن و968 هەزار و 618 دۆلار
-پارێزگاى سلێمانى:31 پڕۆژە بە سەرمایەی ملیارێك و 138 ملیۆن و 332 هەزار و 441 دۆلار
-پارێزگاى هەڵەبجە: 1 پڕۆژە بە سەرمایەى 21 ملیۆن و 517 هەزار و 167 دۆلار
-پارێزگاى دهۆک: 12 پڕۆژە بە سەرمایەى 46 ملیۆن و 65 هەزار و 102 دۆلار
-ئیدارەى سەربەخۆى گەرمیان: 2 پڕۆژە بە سەرمایەی 60 ملیۆن و 491 هەزار و 874 دۆلار
-ئیدارەى سەربەخۆى راپەرین: 3 پڕۆژە بە سەرمایەی 5 ملیۆن و 393 هەزار و 617 دۆلار
– ئیدارەى سەربەخۆى سۆران: 1 پڕۆژە بە سەرمایەى ٨ ملیۆن و 650 هەزار دۆلار