مەرزی کێلێ.
کەى ئاسایى دەبێتەوە؟
بەفر مەرزى کێلێى داخست
وریا فەتاح
بەفربارین مەرزى کێلێى داخست و بەڕێوەبەرى گومرگى راپەڕینیش دەڵێت: ئێمە دیوى خۆمان پاککردووەتەوە و کێشەمان نییە، رێگاى مەرزەکە لە دیوى ئێرانەوە پاکنەکراوەتەوە.
لە بەیانى ئەمڕۆ شەممەوە، بەهۆى بەفربارینەوە هاتوچۆ و ئاڵوگۆڕى بازرگانى لە مەرزى کێلێى سنوورى قەزاى پشدەر وەستاوە، جەوهەر رەسوڵ، بەڕێوەبەرى گومرگى راپەڕین بە 964ى وت، “ئێمە رێگاى دیوى خۆمان پاککردووەتەوە و هیچ کێشەیەکمان نییە و هاتووچۆ بۆ مەرزەکە هەیە، بەڵام رێگاکە لە دیوى ئێرانەوە پاکنەکراوەتەوە و بەو هۆیەوە ئاڵوگۆڕ و هاتوچۆ لە مەرزەکەوە وەستاوە”.
“لە دیوى هەرێمى کوردستانى مەرزەکەوە، زیاتر لە 20 ملیمەتر بەفر باریوە و تیمەکانى پاککردنەوەش بەردەوامن لە راماڵین و پاککردنەوەى رێگاکە”، بەڕێوەبەرى گومرگى راپەڕین واى وت.
لە بارەى ئاساییکردنەوەى هاتوچۆ لە مەرزەکەوە، جەوهەر رەسوڵ دەڵێت: تا ئێستا هاتوچۆ وەستاوە، بەڵام پێشبینى دەکرێت لە ئێوارە یان لە سبەینێوە، هاتوچۆ ئاسایى بکرێتەوە و ئێرانیش دیوى خۆیان پاکبکەنەوە.