سەمەد جەوهەر هێرشی تووند دەکاتە سەر دەستەی کارگێڕی یانەی هەولێر

هێژا خەسرەو ـ هەولێر

راهێنەرى دەستلەکارکێشاوەى یانەى هەولێر، بێتاقەتە و هێرشى توند دەکاتە سەر دەستەى کارگێڕى یانەکە.

چەند رۆژێک پێش ئێستا بەهۆی ئەنجامە خراپەکانییەوە، سەمەد جەوهەری راهێنەری یانەی هەولێری خولی کوردستان نامەی دەستلەکارکێشانەوەی پێشکەشکرد و وازهێنانی لە یانەکەی راگەیاند.

لە لێدوانێکی تایبەتدا سەمەد جەوهەر بە 964ی راگەیاند: بەشێکی زۆری دەستەی کارگێڕی یانەی هەولێر پێیان خۆشبوو دەستملەکارکێشایەوە، ئەوەی ئەوان باسی دەکەن دەڵێن نەماندەویست سەمەد بڕوات، هیچی راست نییە و هەمووی سیناریۆیە.

بەوتەى سەمەد جەوهەر، دەستەى کارگێرى یانەکە سەنگەریان لێى گرتووە و هیچ پاڵپشتییەکیان نەکرووە و وەکخۆى دەڵێت،” پێیان خۆشبوو کە یانەکەم جێهێشت”.

دەشڵێت: بەهۆی ئەم رووداوانەوە زۆر بێتاقەتم و پێشبینی ئەم شتانەم نەدەکرد کە هاتنە پێش، ئێستاش نازانم بۆ داهاتوو بڕیاری چی دەدەم، بەڵام رەنگە بەردەوامبم لە کاری راهێنەرایەتی هەر لەم وەرزەدا.
پێداچونەوە: وریا فەتاح